Aasianni qilalukkanik qernertanik piniarneq ammarpoq

Piniartut peqatigiiffii, kommuuni aamma piniarnermut nakkutilliisut ataatsimeeqatigereernerisigut Qeqertarsuup Tunuani qilalukkanik qernertanik pisat pillugit paasissutissanik eqqortunik Aalisarnermut Piniarnermut Nunalerinermullu Naalakkersuisoqarfik tigusaqarsimalerpoq.

Qeqertarsuup Tunuani pisat suli nalunaarutigineqarsimanngitsut, 2013-imi pisassiissutinit ilanngaatigineqassapput, sinneruttut kommuunimut tunniunneqartinnagit.

Aqutsiveqarfimmi pineqartumi qilalukkanik qernertanik piniartoqarsinnaanngorpoq.

Qeqertarsuup Tunuaniittuni aqutsiveqarfiit ataatsimoorlutik piniartartuni, paatsuugassutigineqarsimavoq aqutsiveqarfik sorleq pisanik nalunaaruteqassanersoq. Tamatuma saniatigut inuussutissarsiutigalugu sunngiffimmilu piniartut akornanni isumaqatigiinngissutaasimavoq kiap pisarineqartoq nalunaarutigisassagaa. Aasianni piniarnerup ammaqqinnissaa tamakkunannga ilaatigut akimmisaarneqarsimavoq. Ajornartorsuitut tamakkua qaangerniarsarissangigut aqutsiveqarfiit APNN-imit kajumissaarneqarput piniartullu aaqqiissutaasinnaasunik isumiasioqquneqarput.

Aqutsiveqarfiit pineqartut tamarmik suli piniarnermik nakkutilliisoqartinneqarput.

Aalisarnermut, Piniarnermut Nunalerinermullu Naalakkersuisoqarfik tallimanngornermi 31. januar nalunaarpoq, aqutsiveqarfinni Qeqertarsuup Tunuani Uummannamilu qilalukkanit qernertanit pisaqartarnermut atatillugu nalunaarsorneqartarneri amigarpallaarmata, qernertanik qilalugarniarneq unitsinneqartoq, tamannalu piaartumik atuutsinneqarluni.