NAMMCO ukiumoortumik ataatsimeersuarpoq

Atlantikup avannaani immami miluumasut pillugit ataatsimiittartoqatigiit Oslomi, Norgimi, ukiumoortumik ulluni makkunani ataatsimiipput.

Nunatsinnit ataatsimeeqataasut piginnaatinneqarpoq KNAPK suleqatigalugu, NAMMCO-p pisussaatitaaffia naapertorlugu, uumassusilinnik misissuinissamut siunissami sunik salliutitsisoqarnissaanik siunnersuuteqarnissamik.

Nunatsinnit ataatsimeeqataasut siuttut allat ilaatigut peqatigalugit NAMMCO-mi Ilisimatuussutsikkut Ataatsimiititaliap nukittorsarnissaa pillugu oqaloqateqarnertik nangissavaat.

Ukiumoortumik ataatsimiinnermi aamma eqqartorneqarpoq nunatsinni aarrit pillugit ilisimatuussutsikkut inassuteqaatigineqartoq. Taassuma saniatigut nunat ilaasortat WTO-mi puisit amii pillugit suliap killiffianik ilisimatinneqarput.

Nunatsinnit ataatsimeeqataasut NAMMCO-p inuussutissaqarluarnissaq aamma immami miluumasut pillugit 2015-mi ataatsimeersuarnissamut piareersaanermut peqataassapput.

Ukiumoortumik ataatsimiinneq februaarip 25-anni aallartittoq aqagu, februaarip 27-anni naammassissaaq.

Kattuffimmut Atlantikup Avannaani Immami Miluumasut Pillugit Ataatsimiititaliamut, NAMMCO-mut ilaasortat tassaapput nunarput, Norge, Island aamma Savalimmiut.

Kattuffik nunarsuup immikkoortuani sumiiffinni aalajangersimasuni miluumasunik imarmiunik nungutsaaliuinermik, isumatuumillu aqutsinermik ilisimatusarnermillu ingerlataqarpoq.