Pisortat aningaasaliissutaannik pitsaanermik nalilersuisarnissaq

Nunatta aningaasaqarnerata akisussaassusilimmik aalaakkaasumillu aqunneqarnissaanut Naalakkersuisut aningaasaqarnermut tunngasunik naalakkersuinermut suliniutaannut atatillugu inuiaqatigiinnut aningaasaqarnikkut kingunerisassai pillugit nalilersuisarnissamut ilitsersuummik suliaqarput.

Misissueqqissaarnernit, naalakkersuinikkut pingaarnersiuinermi maanna atorneqalertussanit, inuiaqatigiinnut aningaasaqarnikkut pissarsiaqaataasussat annaasaqaataasussallu pillugit ersarissumik inernissai takuneqarsinnaalissapput. Apeqqutit paasiuminaatsut taamaaliornermi paasiuminartumik katersorneqartassapput. Apeqqutilli amerlanertigut paasiuminaannerat peqqutigerpiarlugu kiisalu sunniutaasut aningaasatigut kisitsisinngortinneqariaannaaneq ajormata inooqatigiinnikkut avatangiisillu pillugit imminut napatissinnaanerat misissoqqissaarneqartassapput nunallu immikkoortuanut kiisalu nunatsinnut tamarmut sunniutissai ilanngullugit misissoqqissaarneqassallutik.

”Nunarput ataatsimut eqqarsaatigalugu aningaasaqarnikkut unammilligassagut amerliartuinnarput, aammattaaq nunatsinni oqimaaqatigiissumik ineriartornerup qularnaartuarnissaa pillugu ilanngullugu eqqarsaatigigaanni. Inuiaqatigiit aaqqissuussaanerat ineriartortinneqartuartillugu naalakkersuineq attatiinnarneqarsinnaasoq ingerlanneqassappat misissueqqissaarnissamut piumasaqaatigineqartut annertusisariaqarput. Una ilitsersuut atorlugu aningaasaliiffigisat assigiinngitsut inuaqitigiinnut aningaasatigut qanoq sunniuteqarsinnaatigineri sanilliussinnaalerlugillu nalilersorsinnaalissavagut. Misissueqqissaarnerilli aamma inooqatigiinnermut avatangiisinullu nalilersuinernik ilaqarputtaaq, aningaasanngorlugit kisitsisinngortikkuminaatsut, taamaattorli aalajangiiniarnermut pingaaruteqarluinnarsinnaasut” Aningaasaqarnermut Nunamullu Namminermut Naalakkersuisoq Vittus Qujaukitsoq oqarpoq.

Misissueqqissaarnerit sanaartornernut anginernut aningaasaqarnermullu inatsisitigut aningaasalersugassanut ingerlanneqartassapput. Ingerlatseqatigiiffiit tapiiffigineqartariaqartut, attartornissamik pisariaqartitsisut nunattaluunniit karsianut sunniisinnaasut kommunenit Namminersorlutillu Oqartussanit pigineqartut aningaasaliiffiginissaannut nalilersuinissamut misissueqqissaarnerit aamma tunngaviusassapput.

Paasissutissat sukumiinerusut pillugit una attavigiuk: Ministersekretær Helene S. Pedersen, hesp@nanoq.gl