Assartuinermi akigititat qaffanneri Naalakkersuisunit akuerineqartoq

Innuttaasut tamarmik nioqqutissanut aallajangersimasumik pilersuinernut periarfissaqassapput. Tamanna Naalakkersuisut siunertaraat, tamannalu tunuliaqutaralugu assartuinermi akigititat ukioq manna 5 %-imik qaffannissaasa toqqarneqarluni.

Royal Arctic Line A/S novembari 2013-mi assartuinermi akigititat 2014-mi 10 %-imik qaffannissaannik qinnuteqarpoq. Naalakkersulli qinersimavaat assartuinermi akigititat 2014-mi 5 %-imik qaffannissaat. 2015-imilu naligissaalluni.

- ”Assartuinermi akigititat annikinnerpaamik qaffanneqassasut Naalakkersuisut kissaatigisimavaat. Aaqqiinerup toqqakatta Royal Arctic Line A/S-ip peqqinnartumik ingerlatsinissaa qulakkiissavaa, tamannalu tamatsinnut iluaqutaasussanik ingerlatseqatigiiffiup umiarsuarni nutaani aningaasaliisinnaaneranut tunngaviulluni”, taamatut oqarpoq Peqqissutsimut Attaveqarnermullu Naalakkersuisoq, Steen Lynge nangillunilu:

- ”Ukiuni kingullerni assartuinermi annertussutsit appariartorsimapput. Toqqagassat imaassimapput ikinnerusunik tikinneqartarneq imaluunniit assartuinermi akit qaffallugit. Ikinnerusunik tikinneqartarnerup nassatarisussaavaa ulluinnarni nioqqutissaarniarneq malunnaatilimmik ajorseriarnissaa: pilersaarutisiorneq annertusillugu aammalu ilimanartumik timmisartukkut tikisittakkat annertusinissaat. Akiligassartaa pisiniartumut tutsinneqartussaassaaq.”

- ”Naalakkersuisut aalajangerput poortugaaqqanik nassiussinermi akigititat qaffassanngitsut. Royal Arctic Linep naatsorsuutaani tamarmiusuni nassiussanit annikitsunit isertitat annikitsuinnaapput. Paarlattuanilli nunatta illuatungaani ilaquttatsinnut ikinngutitsinnulluunnit poortukkanik nassiussileraangatta annertunerusumik akiliissannginnerput ilinnut uannullu naleqartorujussuulluni”, naggasiivoq Peqqissutsimut Attvaeqarnermullu Naalakkersuisoq, Steen Lynge.

Assartuinermi akigititat nutaat 2014-mi marsip aallaqqaataani atuutilissapput.