Kommunini meeqqat atuarfiinut sipaaruteqarneq

Ilinniartitaanermut Naalakkersuisoq, Nick Nielsen oqarpoq: ”Meeqqat atuarfiat perorsaaqataassaaq atuartitsillunilu. Tassani meeqqat inuit attaveqaqatigiittarneranni, ilinniartitsissutini inuttullu ineriartornerminni aallartilluassapput. Aamma tassani inuttut atukkani kingornussat ajortut qimanneqassapput. Ilinniartitsinermut periusissiap aamma ilinniartitsinermut pilersaarutip nutaap suliarinerannut atatillugu angajoqqaat inuttut atukkatigut, aningaasatigut ilinniagaqarnikkullu kingornutaat apeqqutaatinnagit atuartunut tamanut iluaqutaasumik meeqqat atuarfiata suli pitsanngorsarnissaa Naalakkersuisut isiginiarpaat”.

Nick Nielsen nangippoq: ”Inuusuttut amerlanerusut ilinniarnermik naammassisaqarnissaat Naalakkersuisut suliniutiginiarpaat taakku taamaalillutik imminnut ilaquttaminnillu pilersuinissamut periarfissaqarniassammata. Tamassuma saniatigut Naalakkersuisut anguniagaraat imminnut nappassinnaasumik aningaasaqarnermik pilersitsinissaq. Ineriartortitsinermi tassani pisariaqarpoq meeqqat atuarfianni immikkoortuni tamarluinnarni ilinniartitsinerup pitsanngorsarnissaa. Illinniartitsineq maannakkut ajunngitsumik ineriartortinneqarpoq. Ineriartorneq taanna ingerlateqqissagutsigu meeqqat atuarfinni atuartitsinermi pitsaassuseq ajornerulertissanngilarput”.

Nick Nielsen imatut oqarluni naggasiivoq: ”Naalakkersuisut tusagassiorfiit aqqutigalugit paasivaat, kommunit ilaat – kingullertut Kommuneqarfik Sermersooq – meeqqanut atuarfeqarnermi sipaaruteqarnissaq toqqarsimagaat. Nalunnginnatsigu atuartut tamakkerlugit piginnaasaqalerfiusumik ilinniagaqarnissamik aallartinnissaannut atuarfippassuit piginnaasaqalersitsineq ajortut tamanna isumakulunnartuuvoq. Upperinngilara atuartut ilikkagaqartarnerannut ilinniartitsisullu atuartitsisarnerannut ajortumik kinguneqanngitsumik annertuunik sipaaruteqartoqarsinnaasoq. Naalakkersuisut taamaammat isumaqanngillat meeqqat atuarfiat pitsaassutsimik qaffatsitsinissamik pisariaqartitsisoq sipaarfigissallugu eqqortuusoq, taamaammat kommunit sipaarfiusinnaasunik allanik naleqqunnerusunillu missingersuutiminni ujartuisariaqarput. Meeqqat atuarfianni atuartitsinerup isumassuinerullu suli pitsanngornissaat ineriartortinneqarnissaallu pillugit kommunit oqaloqatiginnissaat Naalakkersuisut kissaatigaat.”