Nakkutilliineq pitsaassuserlu qitiutillugit aallunneqassapput

Ineqarnermut Naalakkersuisoq Siverth K. Heilmann Ilulissani arlalinnik ataatsimeeqateqaqqammerpoq.

Inissiat sananeqartut 24-t alakkarneqarput, kiisalu Qaasuitsup Kommuniata borgmesteria Ole Dorph aamma Ilulissani Kalaallit Nunaanni Sulisitsisut Peqatigiiffiannit sinniisut ataatsimeeqatigineqarput.

Inissiat 24-t taakku alakkarneqarnerinut atatillugu Siverth K. Heilmannip sanaartukkat misissorpai, entreprenør Knud Andersen ingerlatseqatigiiffimmit Sannassisoq-meersoq peqatigalugu sanaartukkat pitsaassusii misissorpai, kiisalu attartortut nutaat ilaat, sanaartukkamik naammagisimaarinnilluartoq pulaarlugu.

- Kalaallit Nunaanni sanaartukkanik nakkutilliineq pitsaassutsimillu qulakkeerineq toqqissisimanartumik ingerlanneqarsinnaasoq takullugu nuannaarutigeqaara, Ineqarnermut Naalakkersuisoq Siverth K. Heilmann oqarpoq, siunissamilu sanaartukkat ingerlanneqarnerini nakkutilliinermi pitsaassutsimillu qulakkeerisar-nermi suleriaatsit tamaasa digitaliseerernerisigut, suleriaatsit pitsaasut nukittorsaqqissavagut. Nunatsinni sanaartorneq pitsaanerulersiniarlugu, akikinnerulersinniarlugu naammassisallu amerlanerulersinniarlugit uteriinnerput aallussinerpullu ingerlatiinnassavarput, Ineqarnermut Naalakkersuisoq Siverth K. Heilmann naggasiivoq.

Qaasuitsup Kommunianni borgmesterip Ole Dorphip aammalu Ilulissani Kalaallit Nunaanni Sulisitsisut Peqatigiiffiannit sinniisut ataatsimeeqatigineqarnerini Ilulissani atuarfissap suliarineqarnerata siuariartornera, unammilligassallu naammassiniarlugit ataatsimut suleqatigiissutigineqarnerat naammagisimaarneqarpoq nuannaarutigine-qarlunilu. Atuarfik sananeqartoq tassaalissaaq atuarfik nutaaliaq, naliliinerlu malillugu Ilulissani pingaartumillu meeqqanit atuartunit naammagisimaarneqartussaavoq.

- Sanaartukkat pingaarutillit pillugit ataatsimoorluta suleqatigiinnissarput nunatsinnut pingaaruteqarpoq, Ineqarnermut Naalakkersuisoq Siverth K. Heilmann oqarpoq.