Ataatsimiititaliap aalajangigassaraa

Inuit aqqinik akuersisartut, inuit atsiornernik angajoqqaanit Heiselberg-ikkunnit sisamanngormat tigusiniarnatik aalajangertut, tallimanngormat tusagassiorfinnut nalunaaruteqarput, Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisumit eqqumiigineqartumik.

”Ataatsimiititaliap siulittaasuanit Biskop-i, Sofie Petersen-imit innersuunneqarpoq suliaq suli ingerlasoq, kisianni taamaattoqanngilaq. Ombudsmand-ip uppernarsarpaa imminerminni suliaq naammassereersoq, taamaattumik Inuit aqqinik akuersisartut itigartitsinerat maanna atuuppoq. Aammalu Inuit aqqinik akuersisartut kisimik suliaq aallarteqqissinnaavaat. Tamanna uanga Naalakkersuisutut ilisimavara, aamma angajoqqaat pineqartut tamanna ilisimavaat”.

Nick Nielsen ingerlaqqilluni oqarpoq:

”Uanga Naalakkersuisutut Inuit aqqinik aalajangiisartut sulinerannut toqqaannartumik akulerussinnaanngilanga. Ataatsimiititaliap sulinera Naalakkersuisoqarfimmut atasuunngilaq, taamaattumilli ataatsimiititaliami aalajangiinerit uanga allanngortissinnaanngilakka. Kisianni tulluartuutingilara Inuit aqqinik aalajangiisartut takkutinngimmata, atsiornerillu angajoqqaaniit katersorneqarsimasut tigujartorlugit. Periarfissarmi taanna iluatsillugu ataatsimiititaliap nalunaarutigisimasinnaagaluarpa suliaq aallarteqqinneqassanersoq, imaluunniit ataatsimiititaliap aalajangernera aalajangiusimaneqarnersoq. Uanga isumaqarpunga takkutinnginneq angajoqqaanut pineqartunut tunngatillugu ataqqinninnginnerusoq, neriuutigaaralu ataatsimiititaliap atsiornerit uanga Naalakkersuisoqarfinniit tigugunigit Heiselberg-ikkunnut ilisimatitsissasoq, suliami ingerlaqqilluni qanoq pisoqassanersoq pillugu.”