Aatsitassarsiorfiit uuliasiorfiillu amerlassusissaat

Aatsitassarsiorfiit aamma uuliasiorluni sinerissap avataani suliassat amerlassusissaannut Naalakkersuisut siunnerfii.

 

2018 tikitsinnagu aatsitassarsiorfiit aamma uuliasiorluni sinerissap avataani qillerinermik suliassat amerlassusissaannut Naalakkersuisut naatsorsuutigisaqarnerat allanngunngilaq. Soorlu tamanna 2014-imiit 2018-imut Uuliasiornermut Aatsitassarsiornermullu periusissami tusarniaassutigineqartumi – aammalu periusissap Inatsisartunut nassiunneqaqqammersup inaarutaasumik ilusilerneqarnerani allannguuteqanngitsoq takuneqarsinnaasoq. Tassani ilaatigut allassimavoq:

”….. piffissami 2014-imiit 2018-imut aatsitassarsiorfiit 3-5-inut ammarneqarsinnaassasut, aamma naliliisoqarpoq ukioq allortarlugu sinerissap avataani qillerinermik suliaqarnerit 1-2-inik amerlassuseqartassasut. Periusissami suliniutissat annertussusaat taakkuninnga qulakkeerinneqataassapput, imaluunniit 2018 naatinnagu annertussusissat piviusunngortinneqarnissaat aallaaviussalluni.”

Akileraartarnermut Atugarissaarnermullu ataatsimiititaliap isumaliutissiissutaa aallaavigalugu Uuliasiornermut Aatsitassarsiornermullu periusissami ungasissumut periarfissanut ilusiliaq imaattoq allassimavoq:

” Naatsorsuinerit naatsorsueriaatsimik tunngaveqartumik suliarineqarput, 2020-mi uuliasiorfimmi nappartanik 500 mio.-inik annertussusilimmik qalluiffiusussami qillerinermi suliffimmik mikisumik pilersitsineq aallartinneqassasoq, aamma 2025-mi uuliasiorfimmi nappartanik 2 mia.-inik uuliamik qalluiffiusussami qillerinermi suliffimmik angisuumik inerisaaneq aallartissasoq. Ataatsimoortumik tapiissutit annikillineqarnerannut, aningaasaateqarfimmit ernianit pissarsiassanut il.il. taarsiissutissanik aningaasaateqarfimmit aningaasanik tigusinissaq tunngavigalugu naliliisoqarpoq, aningaasaateqarfik 2060-imi 435 mia. koruuninit amerlanerusunik katersukkanik pigisaqalersimassasoq.”

Uuliasiornermut Aatsitassarsiornermullu periusissaq pillugu aviisini isumaliutersuummi aatsitassarsiorfiit amerlassusissaannut aammalu sinerissap avataani uuliasiornermi suliassanut naatsorsuutigisaqarnermut tunngatillugu issuaaneq kukkusoq ajoraluartumik ilannguttoorneqarpoq.

Tamatuma kingorna paasissutissat eqqunngitsut KNR-imi iluarsitippakka – aammalu Naalakkersuisut uuliasiornermut aatsitassarsiornermullu suliassaqarfimmi naatsorsuutigisaat eqqortut ilisimatitsissutigalugit.

Sermitsiaq sapaatit akunneri 7-imi professori Minik Rosing-ip apersorneqarneranit ilanngutassiivoq ”Aatsitassanik isumalluarnerujussuarmit tappingersitaaneq”, tassani paasissutissat kukkusut aallaavigineqarlutik. Taamaattumik Naalakkersuisut uuliasiornermut aatsitassarsiornermullu suliassaqarfimmi naatsorsuutigisaat eqqortut aammaloorlunga erseqqissaqqerusuppaat, takuuk matuma siulianiittut.

 

Allattoq             Jens-Erik Kirkegaard, Inuussutissarsiornermut Aatsitassanullu Naalakkersuisoq

 

 

Inussiarnersumik inuulluaqqusillunga

Martin Christiansen

Toqq/direkte 345651

mchr@nanoq.gl