Australiami paasisassarsiorlutik angalasut

Uranmine

Naalakkersuisut aamma Aatsitassanut Ataatsimiititaliaq Australiami uranimut tunngatillugu paasisassarsiorlutik angalapput

Ulluni 2. - 8. februar 2014 Naalakkersuisuni aamma Aatsitassanut Ataatsimiititaliami ilaasortat Australiami annertuumik angalaartussaapput. Angalanermi peqataapput Inuussutissarsiornermut Aatsitassanullu Naalakkersuisoq Jens-Erik Kirkegaard, Avatangiisinut Pinngortitamullu Naalakkersuisoq Kim Kielsen, kiisalu Aatsitassanut Ataatsimiititaliami ilaasortat Doris Jakobsen, Saxtorph Didriksen, Gerhardt Petersen aamma Naaja Nathanielsen.

”Australia nunarsuarmi uranimit isumalluutaasut 33 %-iinik peqarfeqartoq aammalu ingerlasunik sisamanik uranimut aatsitassarsiorfeqartoq piiaanermut, isumannaallisaanermut, avatangiisinik illersuinermut aammalu avammut annissuinermik nakkutiginninnermut tunngatillugu erseqqinnerusumik takusassarsiorfigineqarnissaa pissusissamisoorpoq. Tassani ukiorpassuarni misilittagaasut atorluarneqarsinnaapput peqatigisaanillu aamma uranimit isumalluutaasunik piiaanissaq pillugu Australiami inuiaqatigiinni isumaliutersuutit iluaqutiginiarneqarsinnaallutik”, oqarpoq Jens-Erik Kirkegaard.

Angalanermi ulloq siulleq kanngussammik-uranimik aatsitassarsiorfiup Olympic Dam-ip Adelaide-p avannaani 560 km-isut ungasissusilimmiittup pulaarneqarneranut atorneqarpoq. Olympic Dam-imi aatsitassarsiorfik 1988-imi tunisassiorfiulerpoq, saffiugassamik kanngussammik, uranimik, siilvimik aamma kuultimik akoqartumik 2000 mio. tonsinit annertunerusumik isumalluutitaqarluni. 2012-imi aatsitassarsiorfiup uranoxid 3.885 tons tunisassiaraa. Aatsitassarsiorfik nunap iluani qaarusummi aatsitassarsiorfittaqarpoq tassunga atasumik aatsitassanik suliarinnittarfittaqarluni. Ullumikkut pulaarnermi kalaallit angalaqatigiit uranimik piiaanermi suliap ingerlasarneranik tassungalu atatillugu isumannaallisaanermut aamma avatangiisinik passussinermut periaatsinik il.il. saqqummiivigineqarput.

Naalakkersuisoq Kim Kielsen oqarpoq: ”Avatangiisinik illersuineq aamma pinngortitamut uumasunullu sunniinerit pillugit apeqquteqartoqangaatsiarpoq. Isumaqarpunga apeqqutivut pitsaasumik akineqartut aammalu avatangiisinut tunngasunik passussisarnerat paasisaqarfigilluarpara. Paasisaqarluarpugut oqartussaasut aamma soqutigisaqaqatigiiffiit misilittagaat uagutsinnullu siunnersuutissaat tusagaqarfiginiarlugit naapittussanngorutsigu nassarsinnaasatsinnik.”

Tamatuma saniatigut ingerlatseqatigiiffiup ingerlatani nunap inoqqaavinik peqataatitsiniarnermut suliniutaat saqqummiunneqarput. Aamma Australiami najukkani innuttaasut aammalu nunap inoqqaavisa peqataatinneqarnissaat annertoorujussuarmik aallunneqarpoq. Angalaqatigiit illoqarfik Roxby Downs aatsitassarsiorfimmit 16 km-isut ungasissusilimmiittoq tikeraarpaat. Roxby Downs aatsitassarsiorfimmut suliassap aallartinneqarnerata peqatigisaanik tunngavilerneqarpoq, ullumikkullu 4.500-it missaannik inoqarluni.