Nick Nielsen inerititaqarfiusumik KNR pillugu oqaloqateqarniarpoq

Nick N 2

Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisup Nick Nielsen-ip Inatsisartunut ilaasortat ilaasa KNR-imut inatsisip allannguutissatut siunnersuummi imminut isummatut oqariartuutigisaat eqqumiigai.

Tamatumunngalu atatilluguNick Nielsen imatut oqaaseqarpoq:

“Ersarilluinnarpoq tamatta KNR-imut tunngatillugu iliuuseriniakkagut assigiittut. Tamatta KNR-ip nukittuunik professionel-iusunillu siulersuisoqarnissaa kissaatigaarput. Tamatta kissaatigaarput KNR kiffaanngissuseqartoq aammalu inuiaqatigiinni pissutsinik isorinnittumik isiginnilluni qulaajaasartoq, kisiannili aamma soorunami tamatigoortuusoq ileqqorissaartumillu tusagassiornermini ingerlatsisoq. Tamatta KNR-i aningaasaqarnikkut peqqissumik oqimaaqatigiissumillu ingerlatsisoq kissaatigaarput, aammalu aqutsisuusut siulersuisuusullu suliaminni ungasinnerusumut isigalutik anguniakkaminnik aningaasaliissutiminni isumaginnittut kissaatigaagut. Tamakkualu pissutigalugit eqqumiigaakka partiinit allanit uannut isummatut tunngavilersuutitullu oqaatiginiarneqartartut”.

Nick Nielsen-ip eqqumiigisani ilaatigut makkununnga tunngasut oqaatigai:

“Anda Uldum oqaaseqarsimavoq “Uanga isumaga naapertorlugu pissutsit taamaannerat allatut takusinnaanngilara Siumukkut Nick Nielsen-illu KNR-ip aaqqissuisoqarfiini ingerlatsinermik nakkutilliiniarnerattut”.

Mimi Karlsen oqaaseqarsimavoq “- Illit suliniutit maanna kisermaassilluni fagitigut ingerlatsiniarnertut ulorianartutut oqaatigisariaqarpoq. Illit nammineq aalajangerniarpat siulersuisuni ilaasortaasussat tallimanit sisamat kikkuunissaat. Tamanna tusagassiorfinnut politikkikkut akulerunneruvoq.”

Tamatumunnga tunngatillugu inatsisissatut siunnersuutip § 32-ia issuarniarpara:

§ 32. Siulersuisut KNR-ip siulersuisorai qullerpaat, KNR-illu ingerlatsinera pillugu aalajangersakkat malinneqarnissaannut akisussaanerpaajullutik. Tassunga atasumik siulersuisut akisussaaffigaat KNR-ip ingerlatsinera tamarmiusoq aamma innuttaasunik kiffartuussinermut isumaqatigiissutip eqquutsinneqarnissaa. Siulersuisut ulluinnarni aallakaatitassiorneq aallakaatitassallu ataasiakkaat sunniuteqarfigisussaanngilaat, tak. § 34, imm. 1.

Inatsisissatut siunnersuummi ersarilluinnartumik allassimavoq siulersuisut aaqqissuisoqarfiit ingerlatsinerannut akuleruteqqusaanngitsut. Taamaattumillu tassuuna inatsisiliornerup sukkulluunniit tusagassiortut ingerlatsinerannut akuliuttoqarsinnaanera akornuserpaa”.

Nick Nielsen-ip tamanna tunuliaqutaralugu kajumissaarutigaa inatsisissatut siunnersuut pillugu pitsaasumik piviusorsiortumillu oqallittoqassasoq, oqallinnermilu politikkikkut peqataasunut assani isaappai, oqarlunilu:

“Isumaqarpunga ersarilluinnartoq uagut partiit akornanni pitsaasumik paasissutissanillu tigussaasunik tunngavilimmik oqallittariaqalersugut. Taamaattumik uanga ullumi aalajangerpunga Inatsisartut kultureqarnermut ataatsimiititaliaat qaaqquniarlugu ataatsimeeqatigiumallugu, taakkua peqatigalugit inatsisissatut siunnersuut tamakkiisumik immikkuualuttortai ilanngullugit misissuataarsinnaaniassagatsigu, aammalu ilaasortat isummersuutaat Inatsisartut katersuutinnginneranni pissarsiarereersinnaaniassagatsigit. Ilanngullugillu Demokratit Inatsisartut kultureqarnermut ataatsimiititaliaanni ilaasortaanngitsut ataatsimiinnissamut aggersarpakka. Kissaatigaara KNR-imut arlaannaannulluunniit atanngitsumut tunngatillugu polikkikkut siammasissumik tapersersuisoqarnissaa, tassalu inatsisissatut siunnersuutip siunertarisaa. Taamaattumillu siunnersuutinut isumatusaartunut assut tusarnaarusuppunga, anguniagarput qanoq angusinnaaneripput eqqarsaatigalugu, maluginiarakkumi partiit ilaasa isumaqatiginngikkaat iluseq inatsisissatut siunnersuummi pineqartumi atorneqartoq, siunnersuullu anguniakkatsinnut ataatsimoorussatsinnut naapertuuttutut partiit ilaanniit isigineqanngitsoq.

Uangali suli aammaloorlunga erseqqissaatigissavara nukittuunik siulersuisoqarnissami piumasaqaataammaat piginnaanerit pisariaqartinneqartut tamarmik siulersuisuni inissisimanissaat. Soorlu tamanna pillugu inatsisissatut siunnersuummi § 31, imm. 3-mi imatut allassimasoqartoq:

“Siulersuisut tamarmiullutik tusagassiorneq, kultureqarneq, pisortatut aqutsineq inuussutissarsiornerlu paasisimasaqarfigissavaat. Ilaasortat Inatsisartut Inatsisaat naapertorlugu inassuteqarnertaqanngitsumik Naalakkersuisunit toqqarneqartussat tamarmik immikkut pisortatut aqutsineq inuussutissarsiornerluunniit paasisimasaqarfigissavaat.”

Qanoq iliornikkut siulersuisuni ilaasortassat toqqarneqartassagaluarnersut, suli uanga isumaqarpunga siulersuisuni ilaasortaasussanut piumasaqaataasut nalunaarsorneqarsimasut eqqortuusut, taakkualu oqallinnerup ingerlaqqinnerani tunngaviusariaqartut.”

Nick Nielsen-ip maanna neriuutigaa ataatsimiititaliap politikkikkullu partiit assak isaanneqartoq tigujumaaraat, KNR-llu siunissaa pillugu oqallinnissamut aggerumaartut.

Annertunerusumik oqaaseqartoqarnissaa kissaatigineqarpat atorfilittaq Kaali Olsen oqarasuaatikkut 55 21 45 attavigineqarsinnaavoq.