Avaleraasartuut 100.000 tonsit aalisarneqarsinnaapput

Aalisarnermut, Piniarnermut Nunalerinermullu Naalakkersuisup, Finn Karlsenip, Naalakkersuisunut Tunumi avaleraasartuut 2014-mi aalisarneqarsinnaasut 60.000 tonsit 100.000 tonsinut amerlineqarnissaannut inassuteqaataa ippassaq akuerineqarpoq.

"Misileraalluni 2013-mi iluatsilluartumik Tunumi avaleraasartuunik aalisartoqarpoq. Naalakkersuisoqarfimmit maanna ilisimavarput avaleraasartuunik aalisarnissamut ukioq manna ukiup siulianut sanilliullugu soqutigineqarluartoq. Soqutiginnittoqaqimmat pisassiissutigineqartut ilaqqullugit inassutigaara, Finn Karlsen, Aalisarnermut, Piniarnermut Nunalerinermullu Naalakkersuisoq oqarpoq."

Avaleraasartuunik aalisarniarlutik qinnuteqartut maannamut arlalissuupput. Qinnuteqartut nunatsinneersuupput nunat allamiut umiarsuaataannik attartorlutik avaleraasartuunik aalisarnissaminnut pilersaaruteqartut.

Avaleraasartuut aalisassallugit maannamut qinnutigineqartut 288.000 tonsiupput.

"Isumaqarpunga taama amerlatigisunik pisassaqalernerup kingunerissagaa nunat tamat avaleraasartuunik siunissami pisassat pillugit isumaqatigiinniartarnissaanni nukittunerulernissarput, Finn Karlsen oqarpoq."