Nunalerineq pillugu Siunnersuisoqatigiit ataatsimiinneraniit avammut oqaaseqaat

Savaateqarfik

Nunalerineq pillugu Siunnersuisoqatigiit 32-ssaanik 31. januar 2014 Qaqortumi ataatsimiinneraniit avammut oqaaseqaat

Nunalerineq pillugu Siunnersuisoqatigiit 32-ssaanik 31. januar 2014 Qaqortumi ataatsimiinneranni ataatsimiinneq siulittaasortaamit Niels Lund (SPS) aqunneqarpoq.
Nunalerineq pillugu Siunnersuisoqatigiit annertuumik nuannaarutigaat maanna Nunatta Kujataani nersutit nakorsaannik aajalangersimasumik atorfinitsitsisoqarsimanera aammalu suleqatigiilluarneq pilersinneqareersimammat, siunissamilu annertusarnissaa qilanaarineqarluni.

Nunalerineq pillugu Siunnersuisoqatigiit sakkortuumik akerlilerpaat Qamutit motoorillit akileraarutaat pillugit Inatsisartut inatsisaata allanngortinneqarnera pillugu Inatsisartut inatsissaattut siunnersuutaat. 9. december-imiit 6. januar 2014-imut tusarniutaasoq, inatsimmilu savaatilinnut annertoorujussuarmik aningaasatigut kinguneqartussaasoq. Nunalerineq pillugu Siunnersuisoqatigiit ingammik inatsisissamut akerliupput pissutigalugu inatsisissami aningaasatigut nunalerinermi inuussutissarsiummut aammalu savaatilinnut ataasiakkaanut qanoq aningaasatigut kinguneqassanersoq naatsorsorneqarsimanngimmat. Assersuutigalugu savaatilik 5-nik traktoriutilik, marlunnik biililik marlunnillu snescooteriutilik, inuussutissarsiornermut siunertaqartumik atorneqartut ukiumut akileraarutinut 140.000 kr.-nit tikillugit akiliisalissaaq. Inatsimmi 2004-imi allanngortinneqartukkut savaatillit akileraaruteqartussaajunnaarsinneqarput. Nunalerineq pillugu Siunnersuisoqatigiit Naalakkersuisunut inassutigaat savaatillit akileraarutinik akiliisannginnerat attatiinnaqqullugu.

SPS aamma Neqi A/S peqatigiillutik Naalakkersuisunut allagaqarnikuupput innaallagissamut imermullu akiliutigisartakkat Neqi A/S-imut tunngasut apparteqqullugit. Allagaqartulli allakkatigut itigartitsissummik tigusaqarput, akissullu inaarutaasumik akissutitut akueriumanngilaat. Nunalerineq pillugu Siunnersuisoqatigiit ilaasortaasa SPS aamma Neqi A/S qinnuteqaataat taperserlugu Naalakkersuisunut saaffiginneqqittoqassasoq aalisarnermi pissutsit atuuttunut assigiimmik pineqalernissartik inassutigalugu.Taamaattumik Siulittaasup Niels Lundip siunnersuutigaa Naalakkersuisut tamarmiullutik itigartitsissut nalilersoqqissagaat.
Nunalerinermut siunnersuisooqatigiit ilanngullugu eqqartorpaat immikkut umiarsuarmik attartorluni nerukkaatissanik pajuttarneq, savaateqarfinnut usingiarlugit. Immikkut umiarsuarmik attartorluni assartuisarneq pisariaqartinneqartoq SPS-imit oqariartuutigineqartoq Siunnersuisoqatigiinniit taperserneqarpoq.
Umiarsuullu attartukkap inissaqartillugu savaateqarfinnukartunik allanik useqarsinnaasasoq periarfissaasariaqartoq innersuussutigalugu.

Siunnersuisoqatigiittaaq oqaatigaat Nunalerineq pillugu Ataatsimiititaliarsuup isumaliuutissiissutaa upernaap ingerlanerani saqqummiussassaq pissangallutik utaqqigitsik, aammalu Naalakkersuisut Inatsisartullu isumaliuutissiissutip inassuteqaataat tusaaniarneqassasut, tassami Kalaallait Nunaanni imminut pilersornerulernissamut aqqutissiueqataassammat aammalu inuussutissarsiutip imminut nammassinnaalernerulernissaanut aqqutissiuissammat.

Nunalerineq pillugu Siunnersuisoqatigiit sinnerlugit.

Inussiarnersumik inuulluaqqusillunga

Niels Lund
Siulittaasoq