KNR-imut tunngasumik suliaq inuiaassutsimut attuumassuteqanngilaq

Sermitsiaq.ag-p ilimasaarutigaa KNR-ip aaqqissuisuata maanna soraarsinneqareersup Nikku Olsen-imik Adolfimut assersuussinerata kingorna Nikku Olseni Sermitsiaq nr. 6-imi februarip ulluisa arfineq aappaanni saqqummersussami apeqqusissagaa kalaallit tusagassiorfiisa aaqqissuisunik danskiusunik atuinerat.

Pisimasumut tassunga qisuariaatitut Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq Nick Nielsen imaattumik oqaaseqaateqarpoq: “Uannut pingaaruteqarpoq erseqqissaatigissallugu, uanga KNR-ip siulersuisuisa nassuiaateqarnissaannik kissaateqarnera KNR-ip nammineq iluani attaveqaqatigiinnermut tunngasuummat, isumannaarniarlugu inuiaqatigiinni tusagassiorfiup KNR-ip arlaannaannulluunniit atanngitsutut tusagassiisartuunissamik pisussaaffimminik naammassinninnissaa, ileqqorissaarnissamik susassaqartullu tamaasa naapertuilluartumik naligiimmillu sullineqarnissaannik piumasaqaatinik eqqortitsisoqarnissaa eqqarsaatigalugu. Pisariaqartinneqarpoq tamatsinnit tatigineqarsinnaassasoq KNR-imi siulersuisut ulluinnarni KNR-imi aqutsisuusut peqatigalugit isumannaassagaat pisussaaffiit pineqartut tusagassiorfimmi sumiiffinni tamani malillugu ingerlatsisoqarnissaa. Tamatumunngalu atatillugu nuannaarutigaara KNR-imi sulisut sinniisaata pisimasoq pineqartoq akuerisinnaanagu nalunaaruteqarmat. KNR-ip misissuiffigineqarnissaa kissaatiginngilara, kisiannili kissaatigaara siulersuisut nassuiaasiaminni allaaserissagaat qanoq periaaseqarluni tusagassiorfiup arlaannannulluunniit atanngitsup tatiginassusiata uterteqqinneqarnissaa anguniarniarneqassanersoq.”

Nick Nielsen-ip erseqqissarpaa suliaq namminerminut tassaammat tusagassiortut pitsaasumik ileqqussarsiornissaannut tusagassiortutullu ileqqorissaarnissaannut tunngasumik suliaq, kiisalu nammineq kissaatiginngilluinnaramiuk KNR-ip pisussaaffiinik aammalu pitsaasumik tamatigoortumik isorinnittumillu tusagassiornissamut pisinnaatitaaffiinik killilersuisoqarnissaa.

“KNR-ip tusagassiorfittut kiffaanngissusia aammalu nutaarsiassanut taakkualu tunuliaqutaannut isorinnittumik tunngavilimmik ingerlatsisuunissaa, tassaassaaq KNR-ip naleraa saneqqunneqarsinnaanngitsoq. Uanga uani suliami qiterititara tassaavoq tusagassiorneq pitsaasoq. Maluginiarpara Nikku Olsen-ip aaqqissuisunik danskiusunik tusagassiorfinni atuineq isornartorsiormagu. Uangali aammaarlunga erseqqissassavara uanga pisortaasut sulisuusullu eqqarsaatigalugit qitiutinnginnakku inuiaassuseq imaluunniit sumi inunngorsimaneq. Taamaattumik uani pineqanngilaq danskeq allassimammat, kisiannili allattoqarsimammat.”

Tassalu Nick Nielsen taamatut oqaaseqarpoq, ingerlaqqillunilu: “Tusagassiorfiit nukittuut inuiattut naqisimaneqanngitsumik ineriartornitsinni tunngavigaagut, taamaattumillu uanga kissaatigaara fagitigut piginnaasat qitiutissagigut.”