Fagitigut piginnaasat salliutinneqassapput

Nick Nielsen-ip tikilluaqquaa KNR-imik piginnittuunermut siulersuisussanillu toqqaasarnermut siunissami periusissat pillugit oqallinneq.

”Qulequttat tamakkua oqaluuserineqarnissaat pingaartuuvoq, aammalu taamatulli pingaartigaaq eqqortunik aalajangiisarnissaq, taamaaliornitsigut nunatsinni tusagassiorfeqarnikkut suli aamma nukittunerusumik ingerlatsisoqarnissaa aqqutissiuussinnaagatsigu. Nuannaarutigaara kikkut tamarmik isumaqatigiissutigimmassuk KNR-i professioneliusunik siulersuisoqartariaqarmat. Taamaakkaluartorli eqqumiigisinnaavara, suliami uani susassaqartut, maannalu isornartorsiuillutik oqaaseqartartut, pissutsit pineqartut pillugit inatsisissatut siunnersuutip tusarniaassutigineqarneranut atatillugu oqaaseqarfigalugit isummersuutiminnik nassiussisimanngimmata.”

Naalakkersuisoq Nick Nielsen-ilu ingerlaqqippoq:

”Uanga periarfissat arlalissuit aqqutigalugit siusinnersukkut oqaatigisarsimavara atorfinnik inuttaliisarnermut, siulersuisunik il.il. inuttaliisarnernut isumaga, aammali uteqqissavara; uanga fagitigut naammattunik piginnaasaqarneq pingaarnerpaatikkakku. Aammalu inatsisissatut siunnersuut maannakkutut isikkoqarluni upernaaq manna Inatsisartuni akuersissutigineqassappat qularinnginnakku siulersuisunngortussatut toqqarneqarumaartut, isornartorsiuisunut tamanut qularunnaarsitsiumaartut; tassalu fagitigut naammattunik piginnaasaqarneq pingaarnerpaatissimagipput takuneqarsinnaassammat.

Uanga kissaatigaara nukittuumik professioneliusunillu siulersuisoqarnissarput, taamaaliornitsigut KNR-ip ingerlanneqarnera pitsaasuusinnaaqqullugu ineriartorsinnaaqqullugulu, kiisalu nutaarsiassalerineq naammattumik pitsaassusilimmik ingerlanneqarsinnaaqqullugu,  aamma suliani politikkimut tunngassutilinni. Uanga paasinnittaasera naapertorlugu siulersuisut professioneliusut qaffasissunillu piginnaanillit pitsaanerpaamik qularnaveeqqusiisuussapput KNR-ip nukittuujullunilu arlaannaannulluunniit pituttorsimanngitsumik ingerlatsinissaanut.

Maluginiarsimavara allanik siunnersuuteqartoqarmat siulersuisut professioneliusut qanoq katitserneqarsinnaanerat pillugu. Tamatumunngalu tunngatillugu oqaatigissavara, inatsimmi periaasissaq tunngavigineqartoq aamma Namminersorlutik Oqartussat ingerlatseqatigiiffiutaanni siulersuisussanik toqqaasarnerni atorneqarmat, taakkunani aamma Namminersorlutik Oqartussat, Naalakkersuisutigut siulersuisuni amerlanerussuteqarluartut toqqartarmatigit. Taamaaliortoqartarporlu isumannaarumallugu siulersuisuusussat professioneliunissaat, aammalu piginnaasat pisariaqartinneqartut tamarmik peqataatinneqarnissaat. Iluatsillugulu oqaatigilara maanna illuatungiliuttuusut naalakkersuisuutitaqarallaramik pissutissaqartissimanngimmassuk ingerlatseqatigiiffinni siulersuisunik toqqartuisarnermi periaatsinik allannguinissartik.

Aammalu assersuutigalugu Norge-mi, Sverige-mi Danmark-imilu tusagassaqartitsivinni NRK-mi, STV-mi aamma DR-imi siulersuisut naalakkersuinermik suliaqartunit toqqarneqartarput, - uffalu Svenskit STV-at imminut pigisutut aningaasaateqarfiugaluartoq, NRK-ilu, DR-ilu KNR-itulli pisortat pigisaattut nammineq ingerlasutut suliffeqarfiugaluartut.”

Nick Nielsen aamma KNR-imik piginnittuunerup qanoq aaqqissuunneqarsinnaanera pillugu siunnersuutaasunut assigiinngitsunut isorinnittumik inissisimavoq, tassunga ilanngullugu KNR-ip imminut pigisutut ingerlatsivinngortinneqarsinnaaneranut siunnersuummut.

”Nalorninartoqartippara KNR-ip ingerlatsivittut imminut pigisutut aaqqissuunneqarsinnaanera, pingaartumik aningaasaqarnermiit isigalugu. Ingerlatsivik imminut pigisutut ingerlanneqassappat, tamanna uanga paasinninnera naapertorlugu isumaqassaaq aningaasaqarnikkut pituuttat Namminersorlutik Oqartussanut atasut kittorarneqarnissaannik. Tamannalu tigussaasunngorlugu isumaqarpoq, KNR-ip assersuutigalugu immikkut ittumik aningaasartuutigisai illorsuup oqummik aqqusaarneqarsimanerata kingunerisaanik, KNR-ip nammineq aningaasalersortariaqassagai, Namminersorlutik Oqartussanut maannakkutut aningaasalersortinnagit. Aaqqissuussinerup taamaattumik kingunerisimassagaluarpaa KNR-ip aningaasaqarnerata assorsuaq akornuserneqarnissaa, tamannalu aamma tusagassiornermi pitsaassutsimut allaat sunniuteqarsimassagaluarpoq, immaqalu allaat KNR-ip ingerlaannarsinnaaneranut akornutaasinnaagaluarluni.

Aammalu qaqugukkulluunniit imminut pigisutut aaqqissuussissagaluaraanni isummerfigisassaajuaannassaaq ingerlatsivimmi siulersuisussanik toqqaasarnerup qanoq aaqqissuunneqarnissaa.”


Naalakkersuisoq Nick Nielsen naggasiivoq, København-imiit.