Sanaartorneq pillugu ataatsimeersuarneq

Sanaartorneq pillugu ataatsimeersuarneq 9. aamma 10. september 2014 ingerlanneqassaaq

Sanaartorneq pillugu ataatsimeersuarnissaq pillugu Ineqarnermut Naalakkersuisup Siverth K. Heilmannip aamma Kalaallit Nunaanni Sulisitsisut Peqatigiiffiata pisortaata Brian Buus Pedersenip isumaqatigiissutaat piviusunngulerpoq.

Ataatsimeersuarneq Nuummi 9. aamma 10. september 2014-imi ingerlanneqassaaq.

-    Ataatsimeersuarnermi sanaartornerup pitsaanerunissaa, akikinnerunissaa naammassisaqarfiunerunissaalu pillugu sammisaqarnissarput isumaqatigiissutigisorujussuuarput. Aningaasaliissutaasut nalinginnaasumik innuttaasunut, pingaartumillu sanaartornermut iluaqutaasumik nuannaarutaasumillu inuiaqatigiinni sulitinneqarnissaat pingaaruteqarpoq, Naalakkersuisoq Siverth K. Heilmann oqarpoq.

Taamaattumik aamma isumaqatigiissutigineqarpoq, suliassat neqerooruteqartitsivigineqarsinnaalersut aamma kinguarsaqqinneratik neqerooruteqartitsivigineqartarnissaat sulissutigineqassasoq, taamatullu aamma suliassat allat suiartinneqarsinnaanerinut periarfissat misissorneqarnissaat isumaqatigiissutigineqarpoq.

Kiisalu marsip qaammataata ingerlanerani Ineqarnermut Naalakkersuisup Siverth K. Heilmannip  Teknikkikkut Siunnersuisartunut Ataatsimiititaliaq, Innaallagisserisunut VVS-ilerisunullu Ataatsimiititaliaq kiisalu Sanaartornermi Sanasunut ataatsimiititaliaq ataatsimeeqatigissagai isumaqatigiissutigineqarpoq.

-    Kalaallit Nunaanni Sulisitsisut Peqatigiiffiata suleqatigineqarnera suliniuteqarluarfiusumik ataqqeqatigiiffiusumillu, kiisalu pilersitsiffiulluartunik angusassanillu siunnnerfiusunik oqaluuserisassaqarfiulluni ingerlanneqarpoq. Sullissisut soqutiginartut attuumassutillillu Sanaartorneq pillugu Ataatsimeersuarnermut qaaqqunissaannut qilanaalereerpunga, Ineqarnermut Naalakkersuisoq Siverth K. Heilmann naggasiivoq.

 

Annertunerusumik paasisaqarusunnermi attaveqarfissaq: Naalakkersuisup allattaa Rebekka Kleemann: +299 482223