Narsami meeqqat atuarfianni atuartunut atugassarititaagallartut pitsaanerit

Ilinniartitaanermut Naalakkersuisoqarfiup Narsami atuarfiugallartumut nakkutilliinermut atatillugu tikeraareerneratigut Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisoq aamma Borgmester Jørgen Wæver Johansen oqaloqatigiissimapput utaqqiisaagallartunik pitsaanerusunillu Narsami meeqqat atuarfianni atuartunut atugassaqartitsisoqarsinnaanera eqqarsaatigalugu, Narsami atuarfissap nutaap sananeqareernissaanut.

Oqaloqatigiinnerup malitsigisaanik Kommune Kujalleq arlalinnik iliuuseqarsimavoq meeqqat atuartut pitsaanerusunik avatangiiseqarnissaat eqqarsaatigalugu. Tamannalu ilaatigut kinguneqarsimavoq atuartoqatigiit klassit ininit atuarfissaqqinnginnerusunit kommunip inissaataanut allanut atuarfigissallugit meeqqanut atuartunut naleqqunnerusunut atortulersugaalluarnerusunullu nuunneqartarsimanerannik. Tamanna pillugu Borgmester Jørgen Wæver Johansen imatut oqaaseqarpoq.

”Init atuartitsiviugallartut pisariaqarfiisigut suli pitsaanerusunngortittassavagut. Assut soqutigaarput sanaartorneq nutarterinerlu sapinngisamik sukkasuumik naammassi-neqassasoq, taammattumillu atuartitsineq atuarfiup avataani sapinngisamik ingerlan-niarparput. Taamaaliornikkummi atuarfimmik nutarteraluni iluarsaaqqinneq nutaamillu sanaartorneq ataatsikkut ingerlanneqarsinnaapput, taamaasillunilu suliniut annertuujusoq naggataagut sukkanerusumik naammassineqarsinnaassaaq. Taamatullu aaqqissuussinerup atuartut tamaasa atuarfimmilu sulisuusut iluaqusissavai”.

Naalakkersuisup Nick Nielsen-ip nuannaarutigaa Kommune Kujallermik pitsaasumik oqaloqateqarnerup kingunerisimammagu tigussaasunik pitsanngorsaasoqarnera. Tama-tumunngalu atatillugu Nick Nielsen oqarpoq:

“Paasisinnaavara Kommune Kujallermut annertuunik unammilligassaqartoq, Narsami atuartitaaneq eqqarsaatigalugu. Unammilligassallu suli amerlagallassapput atuarfissap nutaap ullutinnut naleqquttup naammassineqarnissaata tungaanut. Nuannaarutigaarali nakkutilliilluta tikeraarnitsinni kommuni pitsaasumik oqaloqatigisinnaasimagatsigu. Kommuni piumassuseqarpoq meeqqat qitiutinnissaannut, qilanaaraaralu Kommune Kujallermik kommunillu sinnerinik pingasunik siunissami suleqateqarnissara, ataatsimoorluta nunatsinni meeqqat atuarfiannik qaffasaaqatigiissinnaaqqulluta”.

Nick Nielsen-imiit annertunerusumik oqaaseqartoqarnissaa pillugu Naalakkersuisumut allattaagallartoq Nauja Brøns oqarasuaammut normu 34 57 02 attavigineqarsinnaavoq.

Borgmester Jørgen Wæver Johansen-imiit annertunerusumik oqaaseqartoqarnissaa pillugu Ingerlatsivimmi pisortaq Jens Korneliussen oqarasuaatikkut normu 70 41 00 imaluunniit toqqaannartumik 61 41 01-mut attavigineqarsinnaavoq.