Issittup Imartaani inuussutissarsiutigalugu aalisarneq

QULEQUTAQ: Issittup Imartaata qiterpasissuata aqunneqanngitsumik aalisarfigineqarnissaanut illersuinissaq pillugu naalagaaffiit tallimat sineriallit isumaqatigiipput.

Kalaallit Nunaat ulluni 24.-26. februar atorfillit Issittumiittut sineriallit tallimat Issittup Imartaata qiterpasissuani aalisarnermut isumaqatigiissuteqarnissap isumaqatiginninniutigineqarnerani qaaqqusisuuvoq.

Isumaqatigiissutissaq pillugu isumaqatiginninniarnerit pitsaasumik ingerlapput, isumaqatiginninniutissallu oqaasertassai pillugit pitsaasumik anersaaqarluni isumaqatiginninniartoqarpoq.

Ataatsimiinnerup kingorna Aleqa Hammond imatut oqaaseqarpoq:
”Issittup Imartaani inuussutissarsiutigalugu aalisarnermut tunngatillugu ilisimatuussutsikkut tunngavissinneqarnissap tungaanut mianersornissamik tunngaveqarnissaq Kalaallit Nunaannut pingaaruteqarpoq kiisalu naalagaaffiit sineriallit soqutiginnittut allat peqatiserinnginneranni isumaqatigiissuteqaqqaarnissaq salliutinneqassasoq.

Issittup Imartaa pingaaruteqarpoq, aamma Kalaallit Nunaata aalisakkanik pisuussutaanik piujuaannartitsinissamut tunngatillugu. Nuummi isumaqatigiissutissap/nalunaarutissap isumaqatiginninniutiginissaanut alloriarujussuarneq nuannaarutigaara, isumaqatigiissutillu/nalunaarutillu naalagaaffiit aalisarnermik ingerlataqartut ataatsimoorluta Issittumi Imartatsinni aqunneqanngitsumik aalisarnissaat pinaveersimatissavaa.”

Aalisarnermut Naalakkersuisoq Finn Karlsen ataatsimeereernerup kingorna ima oqarpoq:

”Issittumi silap allanngoriartornera malunnarsiartuinnarpoq, taamaammat nunarsuarmioqataasut issittumi isumalluutinik nutaanik periarfissarsiuleriartuinnarput.

Issittumi siku aappat aalisarfissanik nutaanik ammaassissaaq periarfissiillunilu, taamaalippat tamanna uagutsinnut nutaanik unammilligassaqartitsilissaaq.

Tamatumunnga pingaaruteqarluinnarpoq naalagaaffiit sineriatallit tallimat isumalluutinut nutaanut akisussaassusilimmik ingerlatsisooqataanissaat.

Unioqqutitsisumik akisussaaffeqanngitsumillu tamaani aalisalernissamut pinaveersaartitsinissatsinnut assissaqanngitsumik matumani periarfissaqarpugut. Aalisarfiulersussat nutaat mianersortumik aalisarfigineqartarnissaat siumugaaq aalajangersaaffigineqarnissaannut periarfissaqarsinnaalluta.

Taamaattumik Nuummi ataatsimiinnermi anguneqartut naammagisimaarpakka. Naalagaaffiit sineriattallit tallimat suleqatigiillutik akisussaaffilimmik issittup imartaata nakutigineqarnissaanik isumaqatigiillutik angusaqarmata.”

Ataatsimiinnermi Issittumi naalagaaffiit tallimat sineriallit ataatsimoorlutik tusagassiorfinnut nalunaaruteqarnissartik isumaqatigiissutigaat, taannalu tusagassiutinut nalunaarummut ilanngullugu nassiunneqartumut ilanngunneqarpoq uanilu pissarsiarineqarsinnaalluni www.naalakkersuisut.gl.

Paasissutissanik allanik pisoqarusuttoqarpat attavigineqarsinnaavoq:
Emanuel Rosing
Afdelingschef
Departement for Fiskeri, Fangst og Landbrug, 34 53 32