Aaqqissuusseqqinnermik suliamik naliliineq

 

Pisortat suliassaqarfiannik nutarterineq pillugu Namminersorlutik Oqartussat, kommunit KANUKOKA-llu akornanni suleqatigiinnerup ilaatut 2009-mit aaqqissuusseqqinnerup sunniutaasa naliliiffigineqarnissaat isumaqatigiissutigineqarpoq.

Naliliineq siunissami pisortat suliassaqarfiisa qanoq ilusiligaanissaannut, tassunga ilanngullugu namminersorlutik oqartussat kommunillu akornanni nammagassanik suliassanillu agguataarinermut, immaqalu aamma siunissami kommunerujussuit qassiunissaannut qanorlu angitiginissaannut pingaarutilerujussuanngorsinnaavoq.

Misissueqqissaarnerit ukiunut arlalinnut atuuttussat annertuullu pineqarput. Suliassap ilaa tamanut suliarinnittussarsiuunneqareerpoq, kiisalu misissueqqissaartussamik naliliinermilu najoqqutassat pingasut ukioq manna aggustip ulluisa aallaqqaataanni naammassereersimasussat pillugit nalunaarusiortussamik isumaqatigiissuteqartoqareerpoq.

Misissueqqissaaqqinnissaq, tassunga ilanngullugu aamma aaqqissuusseqqinnerup najukkami oqartussaaqataanermut pingaaruteqassusia pillugu innuttaasunik apersuilluni misissuineq qaammatini tulliuttuni aallartinneqassangatinneqarput. Misissuinerit taakku Namminersorlutik Oqartussanit, kommuninit KANUKOKA-miillu suleqatigiilluni isumagineqassapput qaammatillu tulliuttut ingerlanerini Qaasuitsup Kommuniani taasititsinissamut atassuteqaratik.

Naliliineq 2015-ip qiteqqunnerani politikikkut eqqartugassanngorlugit saqqummiunneqassapput tamatumalu kingorna inatsisiliorsinnaaneq 2016-imi aalajangiiffigineqassalluni.


Sukumiinerusumik paasisaqarusukkuit uunga attaveqarit: Aningaasaqarnermut Nunamullu Namminermut Naalakkersuisoq Vittus Qujaukitsoq.