Qalerallit 1.500 tonsit agguaanneqarnissaat

Qalerallit 1.500 tonsit tulaanneqartussanngortinneqartut agguaanneqarnissaat.

Baffin Bugtimi ukiumut siulianut naleqqiullugu qalerallit 1.500 tonsinik amerlanerusut pisarineqarsinnaapput. Aalisarnermut Siunnersuisoqatigiit tusarniaavigereerlugit Naalakkersuisoqarfiup piffissaq qinnuteqaateqarfissaq 14 . martsimut sivitsorpaa.

Avataasiortunut qaleralittassiissutit ukioq manna 8.000 tonsiupput. Uumassusilinnik misissuisut siunnersuutaat 2013-imut sanilliullugu 1.500 tonsinik qaffanneqarpoq. Pisassiissutinut qaffaassutit tamakkiisumik tulaanneqartussaatitaassapput. Taamaammat qalerallit pisarineqartut tamarmik suliareqqitassanngorlugit Kalaallit Nunaanni tunitsivinnut tulaanneqartassapput.

Naalakkersuisut qinnuteqaatit tamaasa ataatsikkoortillugit nalilersorneqartussat aallaavigalugit agguaassinissaq inaarutaasumik aalajangiivigissavaat. Qinnuteqaatit paasissutissanik ukuninnga imaqassapput:

- Qinnuteqaateqartup suliffissuarmut tunitsivissaqarneranut uppernarsaatit
- Qalerallit sumi suliffissuarmut tunineqarnissaannik paasissutissat
- Qinnuteqaateqartup angallammik pisariaqartinneqartutut atorneqarsinnaasumik peqarneranut uppernarsaatit
- Qinnuteqaateqartup nutaamik suliffissualiorsinnaanerminut pisariaqartinneqartunik aningaasaateqarneranut uppernarsaatit
- Suliffissat qassit pilersinneqassanersut aamma tunisassiornerit qanoq ittut qinnuteqaateqartup ingerlatissamaarnerai

Taamatuttaaq piginnittuunermi pissutsit, angallatinut GR-imi nalunaarsorsimasunut inuttaasunut allanullu piumasaqaatit naammassineqarsimassapput.

Qinnuteqarnissamut killiliussaq nutaaq tassaavoq tallimanngorneq 14. marts.

Annertunerusunik paasissutissarserusuttut attaveqarfigisinnaavaat:
Immikkoortortaqarfimmi pisortaq Emanuel Rosing, e-mail: emanuel@nanoq.gl