Qimmiutillit naalliutsitsisimasutut akiliisitaapput

 

Ilulissani qimmiutillit marluk uumasunik illersuineq pillugu inatsimmik unioqqutitsisimanertik nassuerutigaat. Uumasunik naalliutsitsisimasutut, pinerluttulerinermi inatsimmik unioqqutitsisimasutut, akiliisussanngortitaanertik aamma akueraat.

“Iluarinanngilluinnarpoq qimmeqartoqarmat qimmiminnik nakkutiginninngilluinnartunik kaatitsisartunillu”. Taama uumasut nakorsaat Ilulissaniittoq, Sanne Eline Wennerberg, qimmiutillit marluk qimmiminnik paarsinerlussimanertik pillugu akiliisussanngortitaasut pillugit oqarpoq. Inuit pineqartut akiliisussanngortinneqarput aatsaat taamaaliormata.

Uumasut nakorsaata qimmiutillit marluk Ilulissani politiinut ukioq manna aallartissimalersoq nalunaarutigai.
Uumasut nakorsaata qimmiutillip aappaa pillugu nalunaarutigigamiuk ilaatigut ima allappoq:

“Qimmii takuneqarsinnaapput sivisuumik nerisinneqarsimanngitsut. Qimmeq qimmeqarfiani toqunneqartoq sivisuumik nerisinneqarneq ajorsimagami saluttuararsuuvoq. Perlilingaarami aaqqat sullisigineqartartoq plastikkeq nerisimavaa”, Sanne Wennerberg nalunaarummini allappoq, erseqqissaatigalugulu qimmiutillip qimmini kaatsittaqalugit paarinerlussimaqigai.

“Qimmiutillip qimmini taama pisussaanngilai, tamannalu ajorluinnarpoq”, uumasut nakorsaat erseqqissaavoq.

Qimmiutillip aappaata qimmini paarinerlussimavai kaatsittarlugillu – marluk tamanna toqqutigisimallugu.
“Qimmit pisariaqanngitsumik sivisuumik naalliutsinneqarlutillu isumagineqarsimanngillat. Takuneqarsinnaavoq qimmiutillip qimmini ullut tamaasa nakkutigineq ajorsimagai”, Sanne Eline Wennerberg allappoq.

 
Uumasut nakorsaata nuannaarutigaa politiit suliassaq sukkasuumik suliarisimammassuk.
-“Neriuutigaara qimmiutillit paasissagaat qimmiminnut taama iliuuseqarsimanertik inuiaqatigiinnit akuerineqanngimmat. Kinaluunniit qimmilik qimmini ullut tamaasa akisussaaffigisussaavai”, Sanne Eline Wennerberg erseqqissaavoq.

Qimmiutillit inatsimmik unioqqutitseqqippata eqqartuussivikkut suliassanngortinneqarsinnaapput, qimmiinik arsaarneqarsinnaanngorlutik.