Sisimiormiut apeqquterpassuarnik saqqummiussaqartut

Sisimiuni innuttaasunik ataatsimiisitsinermi Naalakkersuisut siulittaasuata saqqummiussineranit aallaaveqartumik apeqquterpassuit saqqummiunneqarput.

Naalakkersuisut Siulittaasuat Aleqa Hammond ulloq 22. februar 2014 Sisimiuni Taseralimmi innuttaasunik ataatsimiititsimmat innuttaasunit 100-t missaanniittut peqataapput.

Ataatsimiisitsinermini Naalakkersuisut Siulittaasuata Naalakkersuisooqatigiinni suliniutissatut siunniussimasatik aammalu suliniutit aallartinneqareersimasut, kiisalu Inatsisartut upernaakkut ataatsimiinnissaanut Naalakkersuisut inatsisissatut siunnersuutaat saqqummiuppai.

Saqqummeereernerup kingorna innuttaasunit immikkut tusarfigerusutaai tassaanerupput sanaartornerup iluani suliariumannittussarsiuusseriaaseq, suliffeqarfissuit allaffissornikkut inissisimanerat, suliffissat nutaat minnerunngitsumillu aatsitassarsiorluni sulineq kalaallillu oqaasii.

Maniitsumi ataatsimiisitsineq 20. februar 2014 ingerlanneqartoq assigalugu, Sisimiuni ataatsimiisitsineq najuuttunit peqataaffigilluarneqartoq naammassineqarpoq innuttaasullu Maniitsumi Sisimiunilu Naalakkersuisut Siulittaasuannit tikinneqarnertik iluarisimaaqaat.

Naalakkersuisut Siulittaasuata Sisimiuniinnermini Qeqqata Kommuniani borgmesteri Hermann Berthelsen ataatsimeeqatigaa kiisalu KNI A/S pisortat ataatsimeeqatigalugit.

 

Annertunerusumik paasisaqarniaraanni attavigineqarsinnaavoq naalakkersuisumut allatsi Tina Davidsen, mobil 48 51 23.