’Angerlannginnermi ataatsimiinneq’ oqaloqatigiinnissamut tunngavissiilluarpoq

Miljoemoedet KK

 

Avatangiisinut Pinngortitamullu Naalakkersuisoqarfiup, suliffeqarfippassuit CSR Greenlandimi, suliffeqarfiit inuiaqatigiinni akisussaaffeqarnermik suliaqartut kattuffianni, peqataasut, pingasunngormat ualikkut aggertippai. Avatangiisinut Pinngortitamullu Naalakkersuisup Kim Kielsenip aaqqissuussineq ammarpaa, suliffeqarfiillu peqataasut avatangiisit pinngortitarlu pillugit suliniuteqarnerat pillugu nersualaarlugit.

Kim Kielsenip suliffeqarfiit Naalakkersuisoqarfiullu akornanni oqaloqatigiinnerup nukittortinneqarnissaa kissaatigalugu oqaatigaa, aaqqissuussinermullu atatillugu oqarluni: ”Suliffeqarfiit siuttuullutik uummaarissumik ersittumillu suliniuteqarnissaasa pingaaruteqarnera erseqqissaatigerusuppara. Suliniuteqarneq imminut akilersinnaasariaqarpoq, taamaattumillu suliffeqarfiit akisussaaffimminnik naammassinninngitsut siunissami amerlanerusunik pineqaatissiissoqartarnissaa, misissuisoqartarnissaa nakkutilliisoqartarnissaalu naatsorsuutigisinnaavaat.”

’Angerlannginnermi ataatsimiinnermi’ Avatangiisinut Immikkoortortaqarfik eqqagassalerinermi suliniutit ingerlasut aammalu suliniuteqarnerit pillugit ilisimatitsivoq, tamannalu oqallinnermik uummaarissumik aallartitsivoq. Suliniuteqarnerup kivinnissaanut ataatsimoornissaq pisariaqartinneqartoq atituumik isumaqataaffigineqarpoq. Suliffeqarfiit attaveqarfii amerlasarput, taamaattumillu Kalaallit Nunaata minguinnerulernissaanik oqariartuummik apuussinissamut tunngavissatut pingaaruteqarlutik.

Aamma silap pissusaanut naleqqussarnissaq sammisassanut ilaavoq, aammalu issittup silaannaata allannguutaanut atatillugu periarfissat unammilligassallu oqallisigineqarput. Silap pissusaata allanngoriartornerata umiarsuit angallannerinut sunniutissai pitsaasut pitsaanngitsullu, soorlu umiarsuit angallavii nutaat, pinngortitami isumalluutinik pissarsisinnaaneq aammalu illoqarfiit nunaqarfiillu ilaasa ukiumi sivisunerusumik orninneqartarsinnaanerinut periarfissat taakkununnga ilaatinneqarput.

Kiisalu nukissiuutit ataavartut atorlugit pisortat pilersuinermut aqqusersuutaannut innaallagissamik tunisisinnaanissamut periarfissat peqataasunut saqqummiunneqarput.

Aaqqissuussineq suliniutip Clean Greenland – Green Companies-ip, CSR Greenlandimit aamma Lotte Frank Kirkegaardimit siuttuuffigineqartup ilaatut pilersinneqarpoq. Suliniummi suliffeqarfiit peqataasut avatangiisini ajoqusiisinnaanerup annikillisinneqarnissaa siunertarineqarpoq, tamannalu Namminersorlutik Oqartussanit tapersersorneqarpoq.

 

Saniatigut apeqquteqartoqarusukkuni, saaffissaq Naalakkersuisup allattaa Karen A. Motzfeldt.

Toqq/direkte 346458 imal. 562450

Maileq: karm@nanoq.gl