Umiatsiaararsortut ukiumut qaleralittassinneqartariaqarput

Stemningsbillede

 

Aalisarnermut, Piniarnermut Naalakkersuisoq Finn Karlsen isumaqarpoq qaleralinnik aqutsiveqarfinni Upernavimmi, Uummannami Qeqertarsuullu Tunuani paggatassiilluni pisassiisarneq unitsinneqartariaqartoq.

- Avannaani angalatillunga aalisartut peqatigiiffiisa ilisimatippaannga umiatsiaararsortut qalerallit qaammammut pisassiissutigineqartut ammannginnerini ulluni marlunni – pingasuni sioqqutsillutik, sinigatik, aalisalereertartut.  Paggatassiissutigineqartunit nunguussaarusunnatik taama pisarlutik.

Finn Karlsenip Avannaani angalanermini aalisartut peqatigiiffiinut saqqummiuppaa umiatsiaararsortut aamma 6 meterinik anginernik angallatillit ukiumut pisassinneqartarnerat assigiittariaqartoq. 

- Tamanna amerlanerpaanit isumaqataaffigineqartoq paasisinnaavara. Umiatsiaararsortut ukiumut qaleralittassinneqartalerpata, tamanna arlalitsigut pitsaaqquteqarsinnaavoq. Umiatsiaararsortut pisassaminnik nunguussaannginnissartik ernumassutigiunnaassavaat aalisarnertillu namminneerlutik aaqqissuusiinnaalissallugu, tunitsiviillu ataatsikkorsuaq tunineqartarnertik anigussallugu. Aalisakkallu pisoqalisimanngitsut tunineqartalissagaluarlutik.

Umiatsiaaqqanut ukiumoortumik qaleralittassiissutigineqartussat ukiuni kingullerni pingasuni qaleralittarineqarsimasut agguaqatigiisinneqarnissaat pisariaqanngitsut Finn Karlsen oqarpoq:

- Qaleralittassiissutigineqartussat umiatsiaaqqap ukiumut aalisarsinnaasianut naapertuutinneqartariaqasallutik.