Frederik Lynge Seoul National Universitymi masterinngornialerpoq

Frederik Lynge 1

 

Aatsitassanut Ikummatissanullu Aqutsisoqarfimmi sulianik ingerlatsisoq Frederik Lynge Korea Kujallermi Seoul National Universitymi nukissiuuteqarneq pillugu ukiuni tulliuttuni marlunni masterinngorniarluni ilisimatusartussanngorpoq.

”Pissanganarpoq aamma ilinniakkamik naammassinninnissannut neriuuteqarluarpunga”, Frederik Lynge februaarip naanerani ilinnialersussaq oqarpoq. Korea Kujallermi Seoul National Universitymi ilinniagaq taaguuteqartoq “International Energy Policy Program” aallartissavaa, tamannalu nukissiuuteqarnermi ingerlatsinermut sulisussanut naleqqussangaavoq.

Frederik Lynge siornatigut kangianiissimanngisaannarpoq, Korea Kujallerlu aatsaat tikittussanngorpaa. Ilisimatusarnermi tuluttut oqaatsit atorneqartussaapput taamaakkaluartoq Korea Kujallermiusut oqaatsinik aamma pikkorissarneqassaaq.

”Ulluinnarni, soorlu pisiniarfinnut iseraangama oqaloqateqarsinnaaniassangama koreamiusut aamma ilinniassaanga”, Frederik Lynge oqarpoq. Ukiunilu tulliuttuni marlunni najugassaa illoqarfissuaq Seoul 23 millioninik inoqarpoq.

Frederik Lyngep pilersaarutigaa ilinniarnini naammassiguniuk Aatsitassanut Ikummatissanullu Aqutsisoqarfimmi atorfigisani uterfigeqqissallugu.

Kalaallit Nunaat aamma Korea Kujalleq aatsitassaqarnerup iluani ilisimatusarnikkut aamma ilisimasanik paasissutisseeqatigiittarnissamut suleqatigiinniarlutik ukiut marlungajaat matuma siorna atsioqatigiipput. Taamatullu isumaqatigiissuteqarnermi Seoul National Universitymi Kalaallit ilisimatusarnissaminnut periarfissaqalerput, tassa ilinniartoq ataaseq imaluuniit marluk ukiut tamaasa aallartissinnaasutut ammaanneqarmata.

Assimut oqaatsit: Frederik Lyngep suliassaasa ilangisarpaat Kalaallit Nunaanni aatsitassat ikummatissallu pillugit nittarsaassivinni saqqummiussissalluni, uani Vancouverimi aatsitassanik nittarsaassinermi assilineqarpoq.

 

 

Annerusumik apeqqutissaqaraanni attavissaq: Inuussutissarsiornermut, Aatsitassaqarnermut Suliffeqarnermullu Naalakkersuisoqarfimmi paasissutissiisartoq Oline Inuusuttoq Olsen,

oqarasuaat +299 34 56 56. e-mail: oiol@nanoq.gl