Finn Karlsen Upernavimmut tikissaaq

Upernavik

 

Aalisarnermut, Piniarnermut Nunalerinermullu Naalakkersuisoq Finn Karlsen Ilulissanut Uummannamullu angalavoq avannaanilu angalanini Upernavimmut ippassaq nangippaa.

- Sumiiffinni pineqartuni aalisartut piniartullu peqatigiiffii pissarsinarluartumik ataatsimeeqatigaakka, aamma Sinerissap Qanittuani Aalisartut Piniartullu Kattuffiat Ilulissani ataatsimeeqatigaara. Aalisartuinnaat ataatsimeeqatigineqanngillat aalisakkerivinni pisortat aamma ataatsimeeqatigineqartarmata, Finn Karlsen oqarpoq.

Aalisarnermut, Piniarnermut Nunalerinermullu Naalakkersuisup aalisartunik piniartunillu ataatsimeeqateqartarnermini qaleralinnik qaammatikkuutaartumik pisassiisalerneq qilalukkanillu pisanik eqqunngitsumik nalunaarsuisarneq ilaatigut oqaluuserai.

Pilersaarutit naapertorlugit Finn Karlsenip Upernavimmiinnermini Upernavik Seafood kiisalu aalisartut piniartullu ataatsimeeqatigissavai.

Finn Karlsen Upernavimmiinnermini nunaqarfik Aappilattoq aamma tikeraassavaa tassani aalisartut piniartullu aamma ataatsimeeqatigissallugit.

Naalakkersuisoq Finn Karlsen Nuummut sisamanngorpat, februaarip 13-anni angerlassaaq.