Assagiarsunniutit killeqarfiup avatinnguani aalisarsinnaasariaqarput

Finn K 1

 

Aalisarnermut, Piniarnermut Nunalerinermullu Naalakkersuisoq Finn Karlsen: - Sinerissap qanittuani assagiarsunniartartut sinerissap qanittuata killeqarfiata avatinnguani assagiarsunniarsinnaasariaqarput.

Sinerissap qanittuani assagiarsunniartut killeqarfiup 3 sømilip avataani maannakkut assagiarsunniaqqusaanngillat. Aaqqissuussineq ukiut kingullit qulit sinnerlugit atuuppoq. Naalakkersuisuni ilaasortap Finn Karlsenip assagiarsunniarfigineqartartut killeqarfii allanngortikkusuppai.

- Taanna allanngortinneqartariaqalerpoq,  sinerissap qanittuani assagiarsunniartartut sinerissap qanittuata killeqarfiata avatinnguani aamma assagiarsunniarsinnaasunngorlugit.

Assagiarsunniarnissami angallatit angissusaat pinngortitarlu tamatumani killeqartitsisooreersut Finn Karlsen isumaqarpoq.

- Sinerissap qanittuani assagiarsunniartartut assagiarsoqarfinni annertugisassaanngitsuni ullumikkut aalisartarput. Killeqarfiup avatinnguani assagiarsunniartalernissaannik ammaassisoqaraluarpat  assagiarsoqarfinnik nutaanik nassaartoqassagaluarpoq.  Taamaalilluni siunissami assagiarsunniartarfigineqartartut isorartuninngussagaluarput aalisarfigineqarsinnaasullu amerlillutik.

Sinerissap qanittuani ukioq manna assagiarsuttassat katillugit 2.550 tonsiupput.

Sinerissap qanittuani aqutsiveqarfinni Sisimiut aamma Nuuk-Paamiut assagiarsuttassat siorna nungummata Naalakkersuisunit ilaneqarput.

2013-mi sinerissap qanittuani assagiarsunniarsinnaanermut akuersissutillit 42-pput.