Inuusuttut aalisarsinnaanermut akuersissuteqalertariaqarput

Inuusuttut aalisarsinnaanermut pisariinnerusumik akuersissuteqalertariaqarput.

Inuusuttut aalisarnermut piniarnermullu Uummannami ilinniarfimmi ilinniarsimasut pisariinnerusumik aalisarsinnaanermut akuersissutinik pisinnaasariaqarput. Nunami suliffiutillit aalisartunut qaleralinnik pisassiissutigineqartunit pisiortorunnaartariaqarput, inuusuttut akuersissutinik pisinnaaqqullugit, taama Aalisarnermut, Piniarnermut Nunalerinermullu Naalakkersuisoq, Finn Karlsen oqarpoq.

Naalakkersuisut tunngaviusumik isumagaat inuusuttut aalisarnermik soqutigisallit akuersissutinik pisariinnersumik siunissami tunineqartarnissaat. Naalakkersuisut aamma anguniagaraat sinerissap qanittuani aalisartut aalaakkaasumik amerlassuseqarnissaat, anguniarlugulu qaleralinnik amerlasoorujussuarnik pisassiissutinit pigisaqartitsinnginnissaq.

- Taamaattumik isumaqarpunga inuusuttut aalisarsinnaanermut akuersissutinik pisariinnerusumik siunissami tunineqartarnissaat.  Ingammik inuusuttunut meeraatillutik  ataataminnik aalisartuusumut ikiuuttarsimasut.  Aamma aalisariummik kingornussisussanut, Aalisarnermut, Piniarnermut Nunalerinermullu Naalakkersuisoq oqarpoq.

Finn Karlsen isumaqarpoq  nunami suliffissuaatillit qaleralittassiissutinik maannakkut ajornanngippallaamik pisisinnaasartut, akerlianik ataataminni aalisartuusimasut akuersissutinik pisinnaatitaanngitsut.

- Aalisartoq siunissami aalisartuutinniarlugu nunami suliffiutillit aalisartunut qaleralittassiissutinit pisisarnerat unitsinneqartariaqarluni, Finn Karlsen erseqqissaavoq.

Ingerlatseqatigiiffiit qaleralittassiissutinik pisiortornerat unitsinneqarpat umiatsiaararsortut  amerliallatsinneqarsinnaassagaluarput,  inuusuttullu aalisartunngornissaminnut  periarfissarissaarnerulissallutik.

Finn Karlsen isumaqarpoq umiatsiaararsortut aamma assagiarsunniarsinnaasariaqartut.