Royal Greenland A/S-imi suli siuariartortoqarpoq

 

Nunatsinni suliffeqarfiit anginersaat Royal Greenland A/S nalinginnaasumik ataatsimeersuaqqammerpoq. Ingerlatseqatigiiffiup 100 mio. koruuniusut angusarivai. Ukiumut kingullermut sanilliullugu angusatigut annikitsumik appariartoqaraluartoq, angusat naammagisimaarnartorujussuartut Naalakkersuisut isigaat. Pingaaruteqartorujussuuvoq Royal Greenland maannakkut ukiut pingajussaanni sinneqartooruteqartumik isertitaqarluni takutitsisinnaammat.

”North Atlantic Champion”-inngornissamut periusissiap nutaap atuutsinneqalernissaanut ingerlatseqatigiiffiup suliaqarnera Naalakkersuisut qanimut malinnaaffigisimavaat. Naalakkersuisut soorunami periusissiaq aqqutissarlu aalajangiunneqartoq nuannaarutigisorujussuuaat. Ersarippoq ”North Atlantic Champion”, piginnittumut naggataatigut tassaasunut inuiaqatigiit kalaallit tamarmik, iluaqutaasinnaasumik atlantikup avannaani aalisakkanik pisuussutinik suliarinninneq ineriartortitsinerlu aallullugit nunatsinni nukittorsaassasoq. Naalakkersuisut Siulittaasuat, Aleqa Hammond, oqarpoq:

”Siullermik pingaarnertullu sulisut, aqutsisut siulersuisullu tamassi ukiut pingajussaanni aammaloorlusi angusanik kusanartunik takutitsisinnaagassi pilluarujussuaritsi. Eqqaamassavarput maannakkut ingerlalluaraluarluta eqqissisimaaginnassannginnatta, kisiannili suli aaqqiissutissanik periarfissanillu nassaarniarnerput ingerlatiinnassagatsigu. Royal Greenland angissusaa eqqarsaatigalugu nunatsinni suliaqartuuvoq pingaaruteqartorujussuaq. Suliaqarnisi qanorlu suliaqarnersi ingerlannerissi – tamarmik inuiaqatigiit sinnerini malittaasumik sunniutaasorpassuarnut pingaaruteqarpoq. taamaattumik tamassi ukiumi nutaami sulilluarnissassinnik aammalu siunissami iluatsitsilluarnissassinnik kissaappassi”.

Naalakkersuisut siulersuisunut makkua toqqarpaat, taamaattumik taakkua imatut katitigaallutik ingerlaannassallutik:

-       Siulittaasoq, Niels De Coninck – Smith

-       Ilaasortaq, Pitsi Høegh

-       Ilaasortaq, Sara Heilmann

-       Ilaasortaq, Pernille Fabricius

-       Ilaasortaq, Peder Tuborgh

 

Sulisunit qinigaapput Lars Berthelsen, Peter Korsbæk aamma Niels Ole Møller.

 

Attavissaq: Allaffimmi pisortaq, Rasmus Pedersen, mobil: +299 558747