Radon illullu iluani silaannaq

 

- Inissiat iluani silaannaannaap radonimik akoqarpallaarnerata ulorianartui, tamatumalu nassatarisaanik inuunermi kingusinnerukkut puakkut kræfteqalersinnaaneq pillugu innuttaasunut mianersoqqusinissaq annertuumik akisussaaffigalugu Naalakkersuisut misigisimapput. Misissuinermimi paasineqarpoq, pingaartumik Narsami Qaqortumilu illut iluanni radon annertusinnaasoq, Ineqarnermut Naalakkersuisoq Siverth K. Heilmann oqarpoq.

Radon silaannaavoq, peqqissutsimut ajoqutaasinnaasoq kræfteqalissutaasinnaasorlu, taannalu takuneqarsinnaanngilaq, naamaneqarsinnaanngilaq mamassusersineqarsinnaananilu.

Narsami Qaqortumilu misissuinerit takutippaat, inissiat iluisa silaannaani radon annertusisinnaasoq.

Radon pillugu paasititsiniutinut, siusinnerusukkut nassiunneqarsimasunut ilassutitut Ineqarnermut Naalakkersuisoqarfik filminik naatsunik pingasunik saqqummersitsivoq. Filmit pingasut taakku KNR TV-kkut takutinneqassapput.

Radon gassiuvoq, radiup qinngornerinik ulorianartunik akoqartoq, nunap iluaniit seerisartoq. Tassalu inissiamut radonimik isaasoqarsinnaavoq. Nunarsuarmi peqqissutsimut suliniaqatigiiffik WHO naliliivoq, radon inuit puammikkut kræfteqalissutaasinnaasut annerpaartaasa tullerigaa, taamaallaat tupamik pujortarnermit qaangerneqarsimalluni. Taamaattumik illut iluini silaannaap radonimik akoqassusiata killilersornissaa pingaaruteqarpoq.

WHO nunanilu avannarlerni radiup qinngornerinut oqartussaasut inassutigaat, illut iluani silaannaap radonimik akoqassusiani kubikmeterimut 100 becquerel qaangerneqassanngitsoq.

Illuliornermut malittarisassani, iluarsaanneqartussatut pilersaarutigineqartuni inassutigineqassaaq, inissiani pioreersuni illup iluata silaannaata radonimik akoqassusiani kubikmeterimut 100 becquerel qaangerneqarsimatillugu pitsanngorsaasoqartassasoq, tassalu maanna killigititaq kubikmeterimut 200 becquereliusunut taarsiullugu.

Sanaartukkat pillugit paasissutissiisarfiup nittartagaa: www.byginfo.gl

 

Inussiarnersumik inuulluaqqusillunga

 

Siverth K. Heilmann

 

Annertunerusumik paasisaqarusunnermi attaveqarfissaq: Naalakkersuisup allattaa Rebekka Kleemann: +299 482223