Uummannani innuttaasunik ataatsimiisitsineq soqutigineqarluartoq

Uummannani innuttaasunik ataatsimiisitsineq soqutigineqarluartoq

6. februar 2014 unnukkut Ilaqutariinnermut Inatsisinillu Atuutsitsinermut Naalakkersuisoq Martha Lund Olsen Uummannani innuttaasunik ataatsimiititsimmat inuit 60 tungaanut ataatsimiigiarput.

Ataatsimiititsinermi Naalakkersuisup saqqummiuppai Naalakkersuisutut ivertinneqarnermi kingorna Naalakkersuisoqatigiinni suliniutissatut siunniussimasatik aammalu suliniutit aallartinneqareersimasut.

Saqqummeereernerup kingorna apeqqutit isumaginninnerup iluani aammalu eqqartuussiveqarnermut tunngassuteqartut soqutigineqarluarlutik apeqqutigineqarput.

Ataatsimiigiat ilaannik immikut suliniut tassallu "Kinguaassiutitigut atornerlugaanerup kinguneranik kingunerlutitsisunut" neqeroorut aallartinneqarsimammat nersorinnissutigaa qujamasuutigalugulu oqaatigalugu.

Uummannami Meeqqat angerlarsimaffiat inimi ataatsimiiffiusumi pinnersaasimammat ini iseruminarpoq aammalu sutugassanik sassaalliutigineqartut tamanik iluarisimaarneqaqaat.

Ataatsimiititsineq ilaaffigineqarluartoq nuannersumik naammassivoq.

 

Attavissaq: Naalakkersuisumut allattaagallartoq Elisabeth P. Wille, email: elwi@nanoq.gl
Mobil: 53 93 71