Tanbreez Greenland A/S-imit qinnuteqaat itigartinneqanngilaq

Tanbreez

Reuters-imit telegrammimi Naalakkersuisut siulittaasuat oqarsimanerarneqarpoq, Naalakkersuisut Tanbreez Greenland A/S-ip piiaanissamut qinnuteqaataa itigartissimagaat. Tassani imaattumik erseqqissaateqassaanga:

”Taamaattoqanngilaq. Paarlattuanik Naalakkersuisut aamma Tanbreez Greenland A/S piiaanissamut akuersissummut tunngatillugu isumaqatiginninniarnerit allartereerpaat, ilanngullugu ingerlatseqatigiiffimmut royalty-mut aalajangersagaq”, oqarpoq Aleqa Hammond, Naalakkersuisut siulittaasuat.

Kalaallit Nunaanni aatsitassanik suliareqqiisarneq pillugu aatsitassanut ikummatissanullu inatsimmi aalajangersakkanut nangissutigalugu Naalakkersuisut kissaatigaat Tanbreez Greenland A/S annertunerusunik avatangiisinut (VVM) aamma inuiaqatigiinnut (VSB) tunngasunik misissuinernik suliaqassasoq. Tamanna isumaqanngilaq qinnuteqaat itigartinneqartoq, kisianni erseqqissaannarneqarpoq pissutsit taakkua pitsaanerusumik paasinarsisinneqarnissaat Naalakkersuisut kissaatigigaat.

Suliap ingerlanerata annertunersaa Kalaallit Nunaanni annertunerpaamik ingerlanneqarnissaa Aatsitassanut ikummatissanullu inatsit malillugu immikkoortuni pingaaruteqarpoq, taamaalilluni nalilinnik pissarsiviusussat annertunerpaartaasa pineranni suliassat nunatta killeqarfiata avataani inissinneqartannginnissaat pingaaruteqarluni.

”Tassami tamanna isorinagu akuerissagutsigu suliffissarpassuit aammalu akileraarutitigut isertitassarpassuit iluatinnartut qatangiinnartittussaavagut. Tamanna Naalakkersuisut akuerisinnaanngilaat akueriniarnagulu”, oqarpoq Aleqa Hammond.