Suleqatigiinnissamut isumaqatigiissut

KANUKOKA Naalakkersuisut

APNN’p kiisalu KANUKOKA´p suleqatigiinnissamut isumaqatigiissusiaq

Qimmit qitsuillu perlerulersinnaanissamut akiuussutissanik inatsisit malillugit kapineqartarnerisa kommuninit isumagineqartalernissaat pillugu Aalisarnermut, Piniarnermut Nunalerinermullu Naalakkersuisoqarfik aamma KANUKOKA 27. januar 2014 isumaqatigiissuteqarput. Isumaqatigiissut 1. februar 2014-imi atuutilissaaq.

Siusinnerusukkut isumaqatigiissutaasimasumi 1. januar 1999-imeersumi qimuttut kisimik perlerornermut akiuussutissanik kapineqartarnissaat isumaqatigiissutigineqarsimavoq. Tamatuma saniatigut isumaqatigiissutaasimasoq najoqqutarineqarpiarsinnaasimanngilaq imarisaalu sukumiinerusumik aalajangersagartaqarsimanani, tamatumalu kingunerisaanik susassaqartunit nalornisitsisarsimalluni. Isumaqatigiissutaasimasoq maanna isumaqatigiissummik nutaamik paasiuminarnerusumik sukumiinerusumillu taarserneqarpoq.

Isumaqatigiissut malillugu perlerulersinnaanissamut akiuussutissatut kapuutit Namminersorlutik Oqartussanit pisiarineqartassapput kommuninullu nassiussorneqartassallutik. Inatsisit malillugit akiuussutissanik kapoorisarnerit ingerlanneqartarnissaat Kommunalbestyrelsit akisussaaffigaat. Tamatuma saniatigut kapineqarsimasut amerlassusaat kommuninit Namminersorlutik Oqartussanut qaammatit pingasukkuutaarlugit nalunaarutigineqartassapput.

Akiuussutissamik kapisisartup akiuussutissamik kapisereeraangami uumasut perlerornermut akiuussutissamik kapitittut amerlassusaat malillugit allagartat tunniuttassavai. Perlerornermut akiuussutissamik kapitissimanermut allagartap uumasup qungasequtaaniinnissaa uumasumik piginnittup akisussaaffigaa.


Qimuttut savallu qimmiisa kapinerinut atatillugu akiuussutissanut, allagartanut kapuutinullu aningaasartuut nunatta karsianit akilerneqartassapput.

Qimminik allanik qimuttuunatillu savat qimmiunngitsunik qitsunnillu kapuuinernut aningaasartuutit uumasut piginnittuinit akilerneqartarsinnaanissaat kommunalbestyrelsinit aalajangersarneqarsinnaavoq. Tassunga tunngatillugu aningaasartuutiviit kisimik akilerneqartarnissaat piumasarineqarsinnaavoq.

Malugiuk qimmivit qitsuutivillu perlerorsinnaanissamut akiuussutissanik kapineqartarnissaat inatsisit naapertorlugit pisussaaffiummat. Uumasut sisamat arfinillillu akornanni qaammateqaleraanngata akiuussutissamik siullermik kapineqartarput, tamatumalu kingorna ukiut pingasukkuutaarlugit kapineqartartussaallutik.

http://www.kanukoka.gl/kl/kommunini_suliassaqarfiit/tusagassiorfinnut_nalunaarutit/perlerorneq