Isumaqatigiissutit nutaat aaqqissuuseqqinnerit sukkallisassavaat

KANUKOKA Naalakkersuisut Missingersuusiornermi suleqatigiinnissamik Namminersorlutik Oqartussat kommunillu KANUKOKA-lu ullumikkut nutaamik isumaqatigiissusiorput aammalu aaqqissuusseqqinnerup nalilersornissaani suliassat akuersissutigalugit. Namminersorlutik Oqartussani kommuninilu aningaasanik aqutsinerup nukittorsaatissaanik tigussaasunik siunnersuuteqarsinnaanissamut pisortat suliassaqarfiini piginnaanernik inerisaanissami pisariaqartitat paasiniarsinnaaneri pillugit isumaqatigiissut aamma atsiorneqarpoq.

Aningaasaqarnermut Nunamullu Namminermut Naalakkersuisoq Vittus Qujaukitsoq oqarpoq:
”Isumaqatigiissutit pingaarutillit ullumikkut atsiorpagut, taakku pisortat suliassaqarfiini aaqqissuusseqqinnissat pisariaqartut sukkallisassavaat. Tamanna Naalakkersuisut, kommunit KANUKOKA-llu akornanni tatigeqatigiinneq pilersinneqarsimasoq eqqarsaatigalugu angusaavoq nuannaarutissaq. Peqatigiilluta pitsaasunik isumaqatigiissusiorsinnaanerput takutipparput”.

KANUKOKAp siulittaasua Martha Abelsen oqarpoq:
”Ataatsimoorluni piumassuseqarneq isumaqatigiissuteqarnerup oqariartuutigisaa nuannaarutigaarput. Aalajangiisinnaassuseqarnerput aammalu suliassat aallartinnissaannut iliuuseqarsinnaassuseqarneq takutipparput. Inuiqatigiinni aaqqissugaanikkut ajornartorsiutit iluarsinissaannut isumaqatigiissutit nukittorsassavaat taavalu suliassat innuttaasunut qaninnerulersinnissaat pillugu aaqqissuusseqqinnermi siunniunneqartut piviusunngortinnissaannut aqqutissiuussissallutik.”

Pisortat suliassaqarfiisa nutarternerini susassaqatigiit suleqatigiinnertik ingerlatiinnassavaat. Apriilimi tulliani ataatsimiinnissap ingerlanneqarnissaa pilersaarutigineqarpoq.