Aatsitassalerinermik Ilinniarfik

Aatsitassalerinermik Ilinniarfik Sisimiuni Teknikimut Ilinniarfiup (KTI) ataaniiginnassaaq

”Sisimiuni KTI-p ataaniittoq Aatsitassalerinermik Ilinniarfik ingerlalluartoq nuunneqassanngilaq, tassa piffissami kingullermi siunnersuutigineqartutut Avannaanut Kujataanulluunniit nuunneqassanngilaq”. Ilinniartitaanermut, Ilageeqarnermut, Kultureqarnermut Naligiissitaanermullu Naalakkersuisup Nick Nielsenip tamanna erseqqissarpaa.

”Atuarfik KTI Sisimiuni ilinniartitaanernut allanut attuumatillugu ingerlalluarpoq, taamaammat allamut aatsitassalerinermik ilinniagaqarnernut tunngatillugu tapersiisinnaanngitsumut sunniiveqatigiiffiusinnaanngitsumullu atuarfiup nuunneqarnissaa naleqqutinngilaq. KTI Sisimiuni sunniiveqatigiiffiusumik ingerlavoq.

Naalakkersuisut pilersikkusuppaat, ilinniarfiit ilinniakkatigut qaffasissumik imminnut ataqatigiittut sineriammi siammarsimallutik ilinniartunut atoruminartuusut, taamaammat ilinniarfitsialaat pioreersut avissaartinneqarnissaat kissaatigineqanngilaq.

Aatsitassalerinermik Ilinniarfiup ukiumut ilinniartitaanerit/pikkorissaanerit assigiinngitsut iluatsilluartumik ingerlattarpai, ukiumullu ilinniartut / pikkorissartut 200-nit amerlanerusut ilinniartuutigisarlugit.
Maannakkorpiaq imaani suliaqartoqanngimmat, imaanngilaq atuarfik suliaqanngitsoq. Aatsitassalerinermik Ilinniarfik assigiinngitsorpassuarnik piareersaalluni suliaqarpoq, taamaammat eqqortuunngilaq atuarfiup imaani suliaqannginnera pillugu Jes Svanep oqaaseqarnera.

Naalakkersuisut maannakkorpiaq ”Ilinniartitaanermut periusissiaq” aamma ”Kalaallit Nunaata uuliasiornermut aatsitassarsiornermullu periusissiassaatut siunnersuut ” tusarniaassutigaat. Periusissiat Inatsisartut upernaakkut katersuunneranni saqqummiunneqassapput, tamatumalu kingorna ilaatigut imaani suliaqartarneq pillugu siunissami pikkorissaasarnissamut ilinniartitsisarnissamullu tunngatillugu qanoq ingerlariaqqittoqassanersoq Naalakkersuisut isummerfigissavaat.”

Inussiarnersumik inuulluaqqusillunga

Nick Nielsen
Ilinniartitaanermut Naalakkersuisoq.