Qilalukkat qernertat piniagaajunnaarput

Qeqertarsuup Tunuani Uummannamilu qilalukkat qernertat piniagaajunnaarput

Aqutsiveqarfinni Qeqertarsuup Tunuaniittuni Uummannamilu qilalukkat qernertat pisarinerinut atatillugu nalunaarsorneqartarneri amigarpallaartaqimmata qernertanik qilalugarniarneq unitsinneqarpoq.

Aqutsiveqarfik Qeqertarsuarmi Uummannamilu piniartut nalunaarsorneqarsimasunit amerlanernik, Qeqertarsuarmilu pisassiissutit sinnerlugit qernertanik pisaqartoqarsimammat, sumiiffinni pineqartuni qilalugarniarneq erngertumik unitsinneqarpoq.

Aqutsiveqarfik Qeqertarsuarmi qilalukkat qernertat 20-it ukioq manna pisassiissutaapput.

Piniarnermut nakkutilliisoq Kalaallit Nunaanni Aalisarsinnaanermut Nakkutilliisoqarfimmeersoq Aalisarnermut, Piniarnermut Nunalerinermullu Naalakkersuisoqarfimmut ippassaq januaarip 30-anni ilisimatitsivoq aqutsiveqarfik Qeqertarsuarmi qilalukkat qernertat 31-it pisarineqarsimasut. Pisassiissutigineqartunit 11-nik amerlanernik pisaqartoqarsimalluni.

Pisanik arlaleriaqaluni nalunaarsuisoqartanngimmat pisassiissutinillu sippuilluni pisaqartoqartarmat Aalisarnermut, Piniarnermut Nunalerinermullu Qaasuitsup Kommunia suleqatigalugu Qeqertarsuup Tunuani aqutsiveqarfiini Uummannamilu qilalukkanik qernertanik piniarneq unitsikkallarpaat.

Naalakkersuisoqarfiup kommuni piumaffigivaa qernertanik piniarsinnaanermut akuersissutit tamaasa kommunimut tunniunneqassasut atorunnaarsinneqassallutillu. Misissuineq pisanillu nalunaarsuinerit tunniunneqarsimaleriarpata akuersissutit atoqqilerneqarsinnaassapput.

Sumiiffinni pineqartuni piniartut peqatigiiffii pisanik nalunaarsuinermik suleqatigineqarput.

Kommunit piumaffigineqarput sumiiffinni qilalukkanik qernertanik suli pisassaqarfiusuni, 25-it inorlugit pisassaqarfiusuni, qernertanik piniarsinnaanermut akuersissutinik normulinnik tunniussissasut. Sumiiffimmi pisassat amerlaqataannik tunniussisoqassalluni.

Makitsinikkut tunniussisoqarsinnaavoq, siornalu pisaqarnissaminnut akuersissummik tunineqarsimanngitsut kiisalu ataatsimoorluni piniarnissamut tunniussisoqarsinnaalluni.

Qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaat naapertorlugu pisat, saniatigut pisat pissassallu sapinngisamik piaarnerpaamik pisanik immikkut nalunaartussaatitaanermi immersugassaq atorlugu nalunaarutigineqassapput.

Naalakkersuisoqarfimmit erseqqissaatigineqassaaq pisassiissutigineqartut kommunimit qularnaatsumik akisussaaffigineqartussaammata, pisassiissutigineqartut aamma sipporneqannginnissaat akisussaaffigineqarmat, tamakkerneqarpatalu piniarneq piaartumik unitsinneqassammat.

Unioqqutitsilluni piniartoqarsimappat ukioq manna pisassiissutit ikilineqarsinnaapput ukiulluunniit tullissaani pisassiissutigineqartut aamma ikilineqarsinnaallutik.
Naalakkersuisoqarfimmit piniartunut erseqqissaatigineqassaaq pisanik amigartumik nalunaarsuisarnerup kingunerisinnaammagu qilalukkanik qaqortanik qernertanillu siunissami pisassiisarnernut sunniuteqarsinnaammat.