Allakkanut ammasunut Steen Lyngep akissutaa

Assartuinermut akit pillugit Brugsenimit Pisiffimmillu allakkanut ammasunut Steen Lyngep akissutaa

- Brugseni Pisiffillu allakkani ammasuni allapput, suliassami assartuineruti akit 10 procentimik qaffanneqarnissaat pillugu RAL-ip qinnuteqaataa pillugu innuttaasunut kukkusumik paasissutissisimasunga. Allapput, akitsuutit tamaasa ilanngullugit naatsorsorneqarpata, 2007-miilli assartuussinermut akit 25 procenti sinnerlugu qaffassimasut. Taamaattumillu isumaqarput, 2009-miilli assartuinermut akit qaffanneqarsimannginnerarlugit paasissutissiinera eqqunngitsuusoq.

- Assartuinermut aki ataatsimoortoq tassaavoq immakkut assartuineq, nassiussisup umiarsualiviillu tigusisussat suliamik passussinerat, uuliamut aamma aningaasat nalingannut tapiliussaq, MRN-mut akitsuut kiisalu aningaasaliissuteqarnermut akiliut. Assartuinermut akit tassaapput immakkut assartuineq aamma nassiussisup umiarsualiviillu tigusisussat suliamik passussinerat. Tassa assartuinermut akit innersuussutikka taakkuupput. Malitsigisaanik paasivara, assartuinermut akit februari 2011-mi 1,5 procentimik qaffassimasut. Qaffariaat taanna ajoraluartumik RAL-ip Namminersorlutillu Oqartussat arajutsisimavaat, Steen Lynge oqarpoq, nangillunilu:

- Assartuinermi akit 1,5 %-mik qaffannerat pillugu paasissutissat siusinnerusukkut pissarsiarisimanngilakka, taamaattumillu isumaqarsimallunga, 2009-miilli assartuinermi akit qaaffaateqarsimanngitsut. Paasissutissaq § 37-kkut Knud Kristiansenimut aamma Gerhardt Petersenimut akissutinni ingerlateqqisimavara. Tamanna soorunami ajuusaarutigaara.

Assartuinermut akit ataatsimoorlutik pisiniartumik nalaanneqartut 25 procentip missaanik qaffariarput.

Qaffakkiartornermut annerpaamik pissutaasut tassaapput uuliamut aamma aningaasat nalingannut tapiliussaq. Tapiliussaq tassaavoq, ikummatissat akii malillugit iluarsiivigineqartartoq. Akit RAL-p nakkutigisinnaanngisai.

Aammattaaq aningaasaliissuteqarnermut akiliut Namminersorlutik Oqartussat 2011-mi atuutilersippaa, RAL-i Namminersorlutik Oqartussat sinnerlugit akiliisitsisarpoq.
Aningaasaliissuteqarnermut akiliut nunaqarfinnut umiarsuarnut pilersuisunut nutaanut aningaasalersueqataavoq.

MRN-imut akiliut 1. Januaari 2013-mi RAL-ip atuutilersippaa. Tassaavoq akitsuutit nalunaarsornerannut akiliut, EU-mit peqqussutigineqartoq.

Aningaasaliissuteqarnermut akiliut imaluunniit MRN-mut akiliut RAL-ip ingerlanneqarneranut ilaanngillat.

- Nassuerutigissavara, inuussutissarsiortut atuisullu ataasiakkaat assartukkanut akit assartukkanullu akit tamakkiisut, tapiissutit assigiinngitsut ilanngullugit paasiniaanissaat ajornartitaanngimmat, Steen Lynge oqarpoq nangillunilu:

- Politikkeritut soqutigaara, RAL-mi pitsaasumik ingerlatsineq assartuinermut akit qularnaassagaat. Kisiannili Naalakkersuisut assartuinermut akinik qaffaanermut aatsaat akuersaarsinnaapput, allanik periarfissaqanngippat. Taamaattumik Naalakkersuisut misissornialerpaat, assartuinermut akit qaffaanermut taarsiullugu sunik allanik periarfissaqarnersoq. Taamaattumik qaffaassuteqarnermut qinnuteqaammut Naalakkersuisut suli isumminngillat. 2011-mi assartuinermi akit qaffariaataat RAL-mit qinnuteqaatip suliarinerata nanginnerani ilanngunneqassaaq.