Sanaartukkat ussissusaai

Sanaartukkat ussissusiisa uuttortarneqartarnerini angusaq pitsaanerpaaq

Ukiorpaaluit ingerlanerini sanaartukkat, Namminersorlutik Oqartussanit aamma inissiaatileqatigiiffik Illuut A/S-imit sanaartorneqartartut sananeqarnerminni ussissusii Blowerdoortest-imik taaneqartartoq atorlugu misilerarneqartarput. Angusaasartut pitsaasarsimapput.

Maanna Sisimiuni illoqarfimmi illumik sananermut atatillugu angusaq aatsaat taama pitsaatigaaq.

Sisimiuni illoqarfimmi illut pingasut, tamarmik immikkut 12-inik inissiartaqartut sananeqarnerinut atatillugu ussissusii sekundimut kvadratmeterimut 0,17 literiinnarnut uuttorneqarput. Taanna appasissorujussuuvoq, aammalu danskit illuliornermut malittarisassaanni killissarititaasumit, sekundimut kvadratmeterimut 1,5 literiusumit appasinnerungaatsiarluni.

Silami pissutsit ussissutsinik uuttuisarnerni taakku najukkatsinni pingaaruteqartorujussuupput, aammalu sannarluttoqannginnissaanut qulakkeereqataasarlutik. Tamatuma saniatigut illumi ussissumi najugaqarnermi iluaqutissat amerlapput:

  • Kiassarnermut akiligassat akikinnerulissapput
  • CO2-mik aniatitsineq annikinnerulissaaq
  • Ilorrisimaarneq pitsaanerulissaaq, iikkanit naternillu nillertunit sueq annikillingaatsiartarmat.

Taakku saniatigut illumi ussissumi silaannaq kissartoq isugutattaqartorujussuaq illup sannaanut nillertunut pitarutissanngilaq, tamanna oqutsitsinermik kinguneqarsinnaammat.

- Sisimiuni sanaartukkani ussissutsimik aatsaat taama angusaqartoqartiginera pillugu nutaarsiassaq nuannaarutigeqalugu tiguara, Ineqarnermut Naalakkersuisoq Siverth K. Heilmann oqarpoq.

- Sanaartornermut atatillugu pitsaassutsimik angusaqarnissap sannarlunnerillu pinngitsoortinneqarnissaasa, taamaalillutalu siunissami pigisatta nalillit qulakkeerneqarnissaasa annertuumik aallunneqarnissaat pingaaruteqarpoq. Nutaanik illuliornermut atatillugu ussissutsinik misileraanernik ingerlatsisarneq sakkussat ilagisinnaavaat. Naalakkersuisoqarfinni illuliornermut malittarisassaativut iluarsaallugit suliarineqarput, taakkununngalu illut ussissusissaannut piumasaqaatit ilanngunneqassapput, taamaalillunilu aamma pineqartumi tassani tamakkiisumik pitsannguinissaq anguneqarsinnaavoq, Ineqarnermut Naalakkersuisoq Siverth K. Heilmann naggasiivoq.

Bloowerdoortest atorlugu misissuinermi silaannarmik millussisartoq, silaannarmillu milluaanikkut illup iluanit naqitsinikinnerulersitsisartoq atorneqartarpoq. Illup iluata naqitsinikinnerulerneratigut silaannaq silamiit quppatigut ussiinnersatigullu illup iluanut isaasarpoq. Uuttuinermi atortut assiliissullu kissassutsimik nillissutsimillu assiliisinnaasoq atorlugit ussiissutsip annertussussusia uuttorneqarsinnaavoq, taammalu sanaartukkap inerlugu tunniunneqarnissaanut illup ussissusissaa qulakkeerneqarsinnaalluni.