Narsami atuarfik

Narsaq skole Ineqarnermut Naalakkersuisoq Siverth K. Heilmann oqarpoq, sisamanngornermi 16. januar 2014-imi Aningaasaqarnermut Akileraartarnermullu Ataatsimiititaliap missingersuut B, siunnersortinit suliarineqartoq tunngavigalugu Narsami atuarfiup iluarsaannissaanut ilassutitut aningaasaliissuteqarnissaq akuersisoqarnera pillugu nalunaarummik tigusaqarami nuannaarutigeqalugu.

Tamatuma kingunerisaanik suliassamut siunnersuut maanna Namminersornerullutik Oqartussat Kommune Kujalleq suleqatigalugu oqaaseqarfigisinnaanngorpaat akuerisinnaalerlugulu.

Maanna suliassap pingaarnerup tassanilu neqerooruteqartitsinermut najoqqutassat suliarineqarnerat ingerlaqqissinnaalerpoq. 2014-imi upernaakkut/aasalernerani isaterinissamut neqerooruteqartitsinerup, aammalu 2014-imi aasakkut nutaamik sanaartornissamut iluarsaassinissamullu suliariumannittussarsiuussinissap piareernissaa naatsorsuutigineqarpoq.

Suliassami Narsami atuarfiup meeqqat atuarfiannut ataatsimik affarmillu aallaavilimmut, Atuarfitsialaap aaqqissuuteqqinneranut naapertuuttumik ilusilikkamut inituumullu iluarsaanneqarnissaa allanngortinneqarnissaalu siunertarineqarpoq. Suliassaq pingasunik immikkoortoqarpoq; isaterineq, nutaamik sanaartorneq iluarsaassinerlu.

- Pilersaarutaasutut naapertorlugit atuartut tamarmik 2016-imi upernaakkut/aasalernerani Narsami atuarfimmut nutaamut isertersinnaanissaat naatsorsuutigineqarpoq, Ineqarnermut Naalakkersuisoq Siverth K. Heilmann naggaviisoq.