Naalakkersuisut Siulittaasuata Københavnimi ataatsimiinneri

Naalakkersuisut Siulittaasuata Aleqa Hammondip Københavnimi tallimanngorneq ulloq 10. januar Ataqqinartorsuaq Dronning Margrethe aamma danskit nunanut allanut ministeriat nutaaq, Holger K. Nielsen, naapeqatigivai.

Naalakkersuisut Siulittaasuata Ataqqinartorsuarmik Dronningimik naapeqateqarnermini suliat maanna ingerlasut naalagaaffeqatigiinnut annertuumik soqutiginaateqartut ilisimatitsissutigai.

Naalakkersuisut Siulittaasuata ullumi aamma danskit nunanut allanut ministeriat nutaaq Holger K. Nielsen ataatsimeeqatigaa. Holger K. Nielsen decemberimi 2013-imi nunanut allanut ministerinngorpoq.

Naalakkersuisut Siulittaasuata danskillu nunanut allanut ministeriata ilaatigut siumut isigisiumik suleqatigiinnissaq, Issittumi Siunnersuisooqatigiit, Nunarsuarmi Arfanniarnermut Kattuffissuaq aamma Kunngeqarfiup nunaviup immap naqqatigut avalassaanganeranik toqqavia pillugu suliniummi piumasaqaatit eqqartorpaat.

Naalakkersuisut Siulittaasuat, Aleqa Hammond, ataatsimeereernerup kingorna imatut oqaaseqarpoq:

”Naalagaaffeqatigiinneq uannut pingaarutilerujussuuvoq. Kunngeqarfiup iluani suleqatigiissinnaaneq angusaqarluarnissatsinnut aalajangiisuulluinnarpoq, aamma nunanut allanut tunngatillugu.

Holger K. Nielsenilu ullumi ataatsimiinnitsinni pitsaasunik eqqartugaqarpugut, danskillu nunanut allanut ministeriata Nunatsinnut tikilluaqqunissaa qilanaaraara”.

Aleqa Hammond,
Naalakkersuisut Siulittaasuat