Inatsisitigut ataataqanngitsut pillugit

Inatsisitigut ataataqanngitsut pillugit Naalakkersuisumik apersuineq pitsaasoq

- Inatsisitigut ataataqanngitsut pillugit suliami politikkikkut aaqqiissuteqarnissap qanillattornissaa upperaara, Naalakkersuisut Siulittaasuat, Aleqa Hammond, oqarpoq, nangillunilu:

- Inatsisissatut siunnersuutip naammassinissaanut paamaarussinnginnissaq qulakkeerneqartariaqarpoq.

Naalakkersuisut Siulittaasuata aamma erseqqissarpaa, Statsministerimik ataatsimeeqateqarnermini oqaatigisimallugu, inuit pineqartut inatsisissatut siunnersuutikkut suliassanngortitsinermikkut ataatassarsiuinikkut kina ataataginerlugu aalajangersaaffigineqarnissaminnik periarfissaqalernissaat, kisiannili suliassassanngortitsinerup nalaani ataatamik qimataasa suliarineqarlutik naammassineqareersimanerat pissutigalugu apeqqutinik akineqanngitsunik suli peqarmat. Tamanna naammassillugu suli eqqartorneqarnikuunngilaq, immikkullu ittumik oqaloqatigiissutigineqaqqinnissaa isumaqatigiissutigineqarpoq.

Siumut isigisumik Nunatsinniit suliamut attuumassuteqartut tamarmik ingerlaavartumik malinnaatinneqartuassapput, taakkununnga ilaallutik Folketingimut ilaasortaatitagut, suliap unigani pitsaasumik ingerlanissaanut ikorfartueqataassagamik. Tusagassiorfiit suliaq pillugu eqqummaarinnerat soqutiginninnerallu tamatumunnga aamma iluaqutaassaaq, taamak oqarpoq Naalakkersuisut Siulittaasuat.

Assigiimmik pineqarnissamut tunngaviusut, pisinnaatitaaffit tamanut atuunnerat, tassunga ilaallutik inuit pisinnaatitaaffii, Kunngeqarfimmi innuttaasunut tamanut atuuttariaqartut Naalakkersuisut Siulittaasuat isumaqarpoq. Inatsisitigut ataataqanngitsut pillugit suliami ilungersunartumi naalakkersuisinikkut suliaqarnermi Kalaallit Nunaata politikkikkut ataatsimoornera  Aleqa Hammondip upperissallugu tunngavissaqarluarsoraa.