Qeqertarsuatsiaarmiut kissaataat tusaaneqassapput

IBAmik isumaqatigiinniarnissamut Qeqertarsuatsiaarmiut kissaataat tusaaneqassapput

Kommuneqarfik Sermersuumeersut aamma Inuussutissarsiornermut, Aatsitassaqarnermut Suliffeqarnermullu Naalakkersuisoqarfimmi atorfilittat True North Gemsip rubininik suliniutaanut atatillugu IBAmik isumaqatigiinniartoqarnissaanut Qeqetarsuatsiaarmiut siunnersuutissaat tusarumallugit ataatsimeeqatiginiarpaat.

Qeqertarsuatsiaat katersortarfianni innuttaasut ataatsimeeqatigineqassapput tallimanngornermi 31.januar 2014 nal. 13.30.

Impact Benefit Agreement tassaavoq pingasuulluni isumaqatigiissut, tamannalu Kommuneqarfik Sermersuumit, True North Gemsimit aamma Namminersorlutik Oqartussanit tigussaasunik suliniutinik imaqartinneqarluni isumaqatigiissutigineqassaaq, Kalaallit Nunaanni inuiaqatigiinnut minnerunngitsumillu nunaqarfimmut Qeqertarsuatsiaanut iluaqutaassalluni.

Ataatsimiisitsinermi Impact Benefit Agreement pillugu saqqummiussisoqassaaq. Rubininillu suliniut Qeqertarsuatsiaani ineriartortitsinermut iluaqutaaniassappat Qeqertarsuatsiaarmiut suliniutinik tigussaasunik siunnersuuteqarnissaminnut ataatsimiinnermi aamma periarfissinneqassapput.

Kommuneqarfik Sermersuumi borgmesteri Asii Chemnitz Narup aamma borgmesterip sinniisussaata aappaa Martha Abelsen ataatsimiinnermi peqataassapput.

”Qeqertarsuatsiaarmiut rubininik suliniummut peqataatinneqarnissaat assut pingaartippara. Tamannami suliniutip Kalaallit Nunaanni inuiaqatigiinnut iluaqutaanissaanut qulakkeerissaaq minnerunngitsumillu Qeqertarsuatsiaarmiunut”, Inuussutissarsiornermut, Aatsitassaqarnermut Suliffeqarnermullu Naalakkersuisoq Jens-Erik Kirkegaard oqarpoq.

” Kommuneqarfik Sermersuumiit Namminersorlutik Oqartussat suleqatigigalugit Qeqertarsuatsiaarmiut peqataatinneqarnerunissaat anguniarlugu suliniarneq iluarisimaarparput. TNGip suliniutaa nunaqarfimmut assut pingaaruteqarsinnaavoq, taamaattumik nunaqarfimmiunik pitsaasumik oqaloqateqarnissaq aamma nunaqarfimmi isumalluutit ilanngunneqarnissaat pingaaruteqarput”, Kommuneqarfik Sermersuumi borgmesteri Asii C. Narup oqarpoq.

Annerusumik paasisaqarusukkaanni attavissat:

Kommuneqarfik Sermersuumi Borgmesteri Asii Chemnitz Narup, mobiltelefon: +299 55 11 54

Inuussutissarsiornermut Aatsitassanullu Naalakkersuisoq Jens-Erik Kirkegaard, Naalakkersuisumut allatsi Kirsten Enequist mobiltelefon: +299 58 37 54