Iluarsagassanullu Aningaasaateqarfik

Sanaartugassanut Iluarsagassanullu Aningaasaateqarfik pillugu Sulisitsisut Peqatigiiffiata ataatsimeeqatigineqarnera

Ineqarnermut Naalakkersuisup Siverth K. Heilmann-ip Sulisitsisut Peqatigiiffianni pisortaq Brian Buus Pedersen ataatsimeeqatigaa, tassanilu ilaatigut Sanaartugassanut Iluarsagassanullu Aningaasaateqarfiup aqunneqarnerata pitsaanerulersinneqarnissaa, kiisalu 2014-imi sanaartorneq pillugu ataatsimeersuartitsisinnaanermut periarfissat oqaluuserineqarput.

- Sulianut piginnaaneqarfinnik, maassakkut pissusiusunik misissueqqissaartussanik nukittuunik sulilersitsinissaq, aammalu Aningaasanut inatsimmi sanaartornermut aningaasaliissutit illuartinneqartut pitsaanerusumik pilersaarusiornissaannut atugassanngortittarnissaannullu tapertaasussanik inassuteqarnissaq – kiisalu naalakkersuinikkut pingaarnersiuilluni tulleriiaarinermik ersersitsiviusumik ingerlatsilernissaq isumaqatigiissutigisorujussuuarput, Ineqarnermut Naalakkersuisoq Siverth K. Heilmann oqarpoq.

Sanaartugassanut Iluarsagassanullu Aningaasaateqarfimmi suliat ataasiakkaat pillugit sanaartornermik suliaqartut pitsaanerusumik paasissutissinneqartarnissamut pisariaqartitsinerup naammassineqarnissaa ataatsimiinnermi isumaqatigiissutigineqarpoq.

Kiisalu 2014-imi sanaartorneq pillugu ataatsimeersuarnermik atituumik peqataaffigineqartumik ingerlatsisoqarnissaa sulissutigineqassasoq isumaqatigiissutigineqarpoq, tassanilu kalaallit sanaartornermi atortussiaasa atorneqarnerisa annertusineqarnissaa, sanaartukkat pitsaassusiinik aallussinissaq, sanaartukkanik aqutsinerup nakkutilliinerullu pitsaanerulernissaa, sanaartornermik suliallit allannguinissamut piareersimanerat aammalu sanaartugassanik pilersaarusiortarnerup kajumiffiunerusumik pitsaanerusumik naammassinniffiunerusumillu ingerlanneqarnissaa sammisassanut ilaassapput.

- Sulisitsisut Peqatigiiffiata ataatsimeeqatigineqarnera nuannersumik illuatungeriinnillu ataqqeqatigiiffiusumik ingerlanneqarpoq, aammalu Sulisitsisut Peqatigiiffiata suleqatigineqarnerata pitsaasup, pilersitsiviulluartup angusassanillu siunnerfeqartup ingerlaqqinnissaanut qilanaarpunga, Ineqarnermut Naalakkersuisoq Siverth K. Heilmann naggasiivoq.