Kalaallit Nunaata Norgellu politikkikkut suleqatigiissinnaaneq eqqartorpaat

Naalakkersuisut Siulittaasuat Aleqa Hammond ulluni makkunani Tromsømiippoq, marlunngornermilu 21. januar Arctic Frontiersip ataatsimeersuartitsinerani, ukioq manna inuit Issittumi inissisimanerannik pingaarnertut qulequtalimmi, oqalugiartunut pingaarnernut ilaalluni oqalugiassaaq. Naalakkersuisut Siulittaasuata Arctic Frontiersip ataatsimeersuarneranut atatillugu ullumi Norgemiut Statsministeriat Erna Solberg ataatsimeeqatigaa.

Ataatsimiinnermi Naalakkersuisut Siulittaasuata Norgemiullu Statsministeriata suliat ataatsimoorullugit soqutigisatik eqqartorpaat. Ilaatigut eqqartorneqartut ilagaat, Norgep Kalaallit Nunaatalu akornanni suleqatigiinnerup ukiuni aggersuni sukkut nukittorsarneqarsinnaanera. Ingammillu uuliasiornerup tungaatigut suleqatigiinnerup pioreersup annertusarneqarnissaa periarfissaqarpoq.

Naalakkersuisut Siulittaasuata aamma Norgep Statsministeriata Erna Solbergip nunani avannarlerni aamma Issittumi suleqatigiinneq eqqartorpaat.

Politikkikkut qulequttat nalinginnaasut, taakkununnga ilanngullugit uranimik aatsitassanillu allanik radioaktiviusunik atueqqusinnginnerup atorunnaarsinneqarnera kiisalu aatsitassarsiornermi ineriartorneq eqqartorneqarput.

Naalakkersuisut Siulittaasuat Aleqa Hammond ataatsimeereernerup kingorna ima oqaaseqarpoq:

”Norgep Kalaallit Nunaannut ukiunilu makkunani Kalaallit Nunaanni ineriartornermut soqutinninnerujussua nuannaarutigaara.

Naleqartitat amerlasuut assingiit Norgelu ataatsimooruppavut. Ingammik nunatut uuliasiortutut aalisarnermillu ingerlatsilluartutut isumaqarpunga, Kalaallit Nunaat Norgemit annertuumik ilinniagaqarsinnaasoq.

Innuttaasut peqqissusaat Issittumilu avatangiisivut innarliasut tunnulliunnagit aatsitassarsiornermik ineriartortitsinerup qulakkeerneqarnissaanut tunngatillugu, Norge maligassiuisuuvoq.

Statsminister Erna Solbergip uannut uppernarsarpaa, ukiuni aggersuni Norgelu suleqatigiinnitta annertusarnissaa – Issittumi Nunanilu Avannarlerni suleqatigiinnerup iluani”.