Statsministerimik NATO-llu qullersaanik naapitsinissaq

AH Oslo 1

Naalakkersuisut Siulittaasuat, Aleqa Hammond, marlunngornermi ulloq 7. januar aallassaaq, Danmarkimi, Bruxellesimi Norgemilu ulapinnartumik angalassalluni ataatsimeeqateqassallunilu. Angalanissamut pilersaarutip ilaa ataani takuneqarsinnaavoq.

Pingasunngorneq ulloq 8. januar Aleqa Hammondip statsminister Helle Thorning-Schmidt ataatsimeeqatigissavaa. Uran pillugu suleqatigiinnerup malitseqartinneqarnera, suliat annertuut pillugit suliniutit - danskillu malitseqartitsineq pillugu inatsisaata ingerlanera, Issittoq pillugu suleqatigiinneq, nunaviup immaap naqqatigut avalassaanganera annertunerusumik pillugu suliniut aamma inatsisitigut ataataqanngitsut  ataatsimiinnermi oqaluuserineqartussanut ilaapput.

 

Kalaallit Nunaata Sinniisoqarfiani Københavnimiittumi ileqquusumik ukiortaarsiorluni ilasseqatigiissitsisarneq Naalakkersuisut Siulittaasuat qaaqqusisoralugu sisamanngornermi ulloq 9. januar ingerlanneqassaaq. Ulloq taanna siusinnerusukkut Aleqa Hammondip USA-p Danmarkimi ambassadøria Rufus Gifford naapissavaa.

 

Naalakkersuisut Siulittaasuat aamma tallimanngornermi 10. januar Dronningimik naapeqateqarnissaminut qaaqqusaavoq, tamatumalu kingorna Naalakkersuisut Siulittaasuat Danmarkip nunanut allanut ministerianik Holger K. Nielsenimik ulloqeqqasioqateqarluni ataatsimeeqateqassaaq.

 

Tamatuma kingorna Naalakkersuisut Siulittaasuat Bruxellesiliassaaq, tassani Kalaallit Nunaata Bruxellesimi Sinniisoqarfiani ukiortaarsiorluni ilasseqatigiinneq ingerlatissallugu, pingasunngornermi ulloq 15. januar. Naalakkersuisut siullermeerlutik Bruxellesimi ukiortaarsiorluni ilasseqatigiissitsissapput, taamaasillunilu ileqqoq nutaaq aallarnerneqassaaq. Ilasseqatigiinnermut qaaqqusat tassaapput EU-mi aalajangiisartut attuumassuteqarfigisat (siunnersuisoqatigiit, kommissioni aamma qinikkat), nunat EU-mi ilaasortaatitaqartut aallartitaat aamma Bruxellesimi Kalaallit Nunaata EU-mut tunngasutigut suleqatigisai attuumassuteqartut tamarmik.

Naalakkersuisut Siulittaasuata Bruxellesimi aamma NATO’p allattaanera Anders Fogh Rasmussen, EU Kommissionip Missingersuutinut kommissæria Janusz Lewandowski, EU’mi Siulittaasutitaqartup Grækenlandip aallartitaa Theodoros Sotiropoulos, kiisalu EU-mi NATO-milu danskit aallartitaat ataatsimeeqatigissavai.

 

Taamatuttaaq Aleqa Hammond ukiumoortumik Arctic Frontiersit ataatsimeersuarnissaannut ulloq 21. januar Tromsømi, Norgemi, pisussamut qaaqqusaavoq, tassanilu Norgemiut statsministerertaavannik qiningaarlaamik, Erna Solbergimik, ataatsimeeqateqarnissaminut periarfissaqassaaq.

Naalakkersuisut Siulittaasuat ulloq 24. januar Nuummut utissaaq.