Naalakkersuisut Siulittaasuat ukiortaami ilassinnippoq

AH nytaarsreception 2014

 

Naalakkersuisut Siulittaasuat Aleqa Hammond innuttaasunut nunatsinnut sullissilluartunut, pisortani atorfilinnut, Inatsisartuni Naalakkersuisunilu ilaasortanut, kattuffinneersunut peqatigiiffinneersunullu ukiortaami ilassinnippoq Hans Egedep illuani 31.jan. 2014.

 

Assilisat takukkit.

 

Naalakkersuisut Siulittaasuat Aleqa Hammond ukiortaami ilassinninermini qaaqqusanut ima oqalugiarpoq:

"Asasakka Naalakkersuisut, Inatsisartuni ilaasortat, nunat allat aallartitaat, arnat angutillu

Ullumi maanga tikilluaqqusinnaagassi uannut ataaqqinaataavoq. Manna ilasseqatigiinneq tassaavoq Naalakkersuisut siuttuuffigisama ukiortaami ilasseqatigiinnerat siulleq Nuummi pisoq, ilasseqatigiinnerlu iluatsillugu tamassi 2013-imi inuiannut kalaallinut Nunatsinnullu sulisimanersi pillugu qutsavigerusuppatsigit.

Ullumi maani katersuunnitsinnut pissutaasoq tassaavoq, iliuuserisat nersorinninniutiginissaat, iliuutsit ataasiakkaat ataatsimoortullu Nunatsinnut inuiannullu kalaallinut iluaqutaasut – inuiaqatigiinnut iliuuseqarneq ingerlaavartumik pisariaqartinneqartoq.

Soorlu assersuutigalugu peqatigiiffiit tassaapput inuiaqatigiinnut ataqatigiiffigissallugit pingaaruteqartut, tamannalu pisarpoq taakkua assigiingitsorpassuarnik sammisaqartitsinerisigut, sammisamik pimoorussinermik kajumissusermillu tunngaveqarluni ingerlatsinermik tunngaveqartunik. Taakkoqanngitsuuppat ataqatigiinneq allaanerusimassagaluarpoq – peqatigiiffiit Nunarput ataasiulersittarpaat inuiaallu akimorlugit ataatsimuulersittarlugit. Naapeqatigiinnermut tunngaviusoq tassaammat taakkua sammisassaqartitsinerat, aammalu nunap sukutsitaani najugaqarneq, kulturi oqaatsillu akimorlugit ikinngutitaartornermik kinguneqaqqajuttaroq.

Naalagaaffiit allat sinniisut maani Nunatsinni sinniisoqarnissaminnik aalajangiussisimasut aamma taarusuppakka. Taakkoqanngitsuuppat ingerlaavartumik oqaloqatigiinneq illuatungeriillunilu paaseqatigiineq angussallugit ajornarnerusimassagaluarput. Taamaattumik taakkua Kalaallit Nunaata inissisimaneranik nukittorsaaqataanerat pillugu iliuusaat pillugit aamma qujaniarpugut, minngerunngitsumillu inuiaqatigiit nunat tamalaat akornanniittut akornanni isigineqarnermut pitsaasumut.

Taakkua saniatigut innuttaasut immikkut ittumik taasarialimmik assigiinngitsunik inuiaqatigiinnut kalaallinut iliuuseqarnermikkut Nersornaammik nersornaaserneqarsimasut eqqaarusuppakka. Nersornaatisisimanersi tunngavissaqarpoq, tamannalu ilissi uagullu tulluusimaarutigisinnaavarput, tassaangassi tamatta angorusutatsinnik angusaqarsimasut.

Naggasiutigalugu aamma periarfissaq manna atorlugu Inatsisartuni qinikkat Naalakkersuisullu inuiaqatigiit ineriartoqqinnissaannik sulissuteqarnerat pillugu iliuuseqarnerat erseqqissarusuppara. Ilaannikkut taamatut suliaqarneq, ingerlaavartumik isumaqatigiinniarnermik oqallinnermillu imaqartoq, tamatigullu isumaqatigiiffiujuaannanngitsoq piffissap ilaani artornartorujussuusinnaasarpoq. Eqqaamasariaqangarpulli tassaavoq, taamatut assoroorlui sulinermi angusat tassaapput inuiaqatigiit ataatsimut isigalugit aalajangiinerit – taamaasiornermilu oqallinneq, isumannik assallattaarineq tunngaviliisuuvoq pitsaasumik. Uagutsinnut pingaaruteqarnerpaaq tassaavoq, ingerlaavartumik aalajangiisarnerit ineriartornermik kinguneqartarmata inuiaqatigiinnillu ataatsimut isigalugu siuariartitsisarmata.

Taamatut oqaaseqarlunga 2013-imi tamassi iliuuserisimasasi pillugit qujavunga, ukiumilu nutaami ajunnginnerpaanik kissaallusi ukiup nutaap pilluarnartuunissaanik kissaappassi.

Ukiortaami pilluaritsi."