Upernavik Seafood tunitsivioqqilissaaq

Upernavik Seafoodip tunisassiorfiit ammarniarpai.

- Tusagara nuannerluinnarpoq, ilisimatinneqarama Upernavik Seafoodip tunisassiorfii marluk ammartussanngormata, Nuussuarmi Upernavik Kujallermilu tunisassiorfiit ataasinngorpat ammartussanngorlutik, taama Aalisarnermut, Piniarnermut Nunalerinermullu Naalakkersuisoq oqarpoq.

Upernavik Seafoodip tunisassiorfiit pineqartut ataasinngorpat, februaarip 3-anni ammassavai.

Finn Karlsen Naalakkersuinut ippassaq ilaasortanngorami erseqqissaalluni oqarpoq suliassami siullersariumaarlugu Upernavik Seafoodimik oqaloqateqassalluni.

Upernavik Seafood tusagassiorfinni ulluni kingullerni sammineqangaatsiarpoq tunisassiorfimminik matusisimanera pillugu.

- Upernavik Seafoodip pisortaa, Flemming Andersen, ullaap tungaani oqaloqatigivara. Taassumalu ilisimatippaanga Nuussuarmi Upernavik Kujallermilu tunisassiorfiit ammarniarlugit, Finn Karlsen, Upernavik Seafoodimit februaarimi tikeraarsarneqartoq oqarpoq.

Finn Karlsen erseqqissallunilu oqarpoq Upernavik Seafoodimik  paaseqatigiiffiulluartumik oqaloqatigiinnerusoq.

Upernavik Seafoodip pisortaa Flemming Andersen oqaluttuarpoq naatsorsuutigalugu tunisassiorfinnut qalerallit ullormut 1-2 tonsit tunineqartarumaartut, tunisassiorfinni aalisakkerisut sisamat missaanniittut sulisorineqartassallutik.

Paasissutissanik annerusunik paasisaqarusuttut uunnga saaffiginnissinnaapput; Naalaakkersuisoqarfimmi pisortaq Jørgen Isak Olsen 54 53 08