Qalerallit 1.500 tonsit

Qalerallit 1.500 tonsit tulaanneqartussanngortinneqartut agguaanneqarnissaat

Baffin Bugt-imi qaleralittassat siornamut sanilliullugit 1.500 tonsinik amerlanerupput. Qinnuteqarfissaq januarip 28-ani naassaaq.

Ukioq manna avataani qalerallit 8.000 tonsit pisassiissutigineqarput. Biologit innersuussutaat siornamut sanilliullugu 1.500 tonsinik qaffariarsimavoq. Taamaasilluni pisassanik qaaffaassutigineqartoq tamakkiisumik nunamut tulaassassanngortinneqarpoq. Taamaasilluni qalerallit pisarineqartut tamarmik Kalaallit Nunaanni tunitsivinnut tulaanneqartassapput suliareqqitassanngorlugit.
“Qaffaanermi pisassiissutit tamakkiisumik tulaanneqartussanngortinneqassapput tamanullu neqeroorutigineqarlutik, taamaalilluni kikkulluunniit taakkunannga aalisarsinnaatitaasut tulaassisinnaatitaasullu kiisalu pisanik tamarmiusunik suliarinnissinnaasut eqqarsaatigineqassallutik. Soorunalimi piumasaqaatit allat soorlu piginnittuunermut tunngasut, angallatit GR-normuisa nalunaarsorsimanissaat, inuttanut tunngasut il. il. naammassineqarsimatillugit.”
Naalakkersuisut novemberip 8-ani 2013-imi taamatut nalunaaruteqarput.

Tamatuma kingorna qinnuteqaatinik arlalinnik Naalakkersuisoqarfik tigusaqarpoq.

Matumuunali nalunartut pillugit aalisarnermullu inatsimmi § 22 innersussutigalugu nalunaarutigineqassaaq qaleralinnut 1.500 tonsinut aalisarnissamut qinnuteqarfissaq ataasinngornermi januarip 28-ani 2014-imi naasussaammat.

Qinnuteqaammi ersarissumik nalunaarutigineqassaaq sumut qalerallit pisat tulaanniarneqarnersut suliffiillu qassit ukiumut tamanna aallaavigalugu pilersinnissaat naatsorsuutigineqarnersoq.

Piginnittuunermut tunngasut, angallatit GR-normuisa nalunaarsorsimanerannut, inuttaqarnermut piumasaqaatit Naalakkersuisoqarfimmut saaffiginninnermi immikkut paasissutissiissutigineqarsinnaapput.