Norgemik aalisarnikkut suleqatiginnissinnaaneq

Aleqa og Aspaker 1

Kalaallit Nunaata Norgellu aalisarnermi suleqatigiittoqarsinnaanera eqqartorpaat

Naalakkersuisut Siulittaasuat Aleqa Hammond ulluni makkunani Tromsømiippoq, marlunngornermilu 21. januar Arctic Frontiersip ataatsimeersuartitsinerani, ukioq manna inuit Issittumi inissisimanerannik pingaarnertut qulequtalimmi, oqalugiartunut pingaarnernut ilaalluni oqalugiassaaq. Naalakkersuisut Siulittaasuata Arctic Frontiersip ataatsimeersuarneranut atatillugu Norgemiut Aalisarnermut Ministeriat Elisabeth Aspaker ullumi ataatsimeeqatigaa.

Naalakkersuisut Siulittaasuata Norgemiullu Aalisarnermut Ministeriata ataatsimeeqati-giinnerminni ataatsimoorluni soqutigisat eqqartorpaat. Eqqartorneqartunut ilaatigut ilaap-put silap allanngornera ukiunilu aggersuni Issittup Imartaani aalisalertoqassappat, tamatuma biologit siunnersuinerat tunngavigalugu ingerlanneqarnissaa, taamaasilluni kalaallit aalisakkat tungaasigut pisuussutaasa tunngaviat silap allanngorneranut ilutigitillugu Issittup Imartaani aalisarsinnaanerup ammaanneqarneranut atatillugu avataaneersunit nungusannginneqarnissaa anguniarlugu.

Kalaallit Nunaat ulluni 24.-26. februar Nuummi Issittumi nunat tamat sineriallit ataatsimiinneranni qaaqqusisuusovq, tassani nunat pineqartut unammilligassatik pillugit ataatsimut paasinnittaaseqalerniarlutik imminnut qanillattorniartussaapput. Elisabeth Aspakerip oqaatigaa, Norgep ataatsimiinnermut peqataanissani qilanaarigaa aammalu Norgemiut nunat Issittumiittut sineriallit tallimat aalisarnerannut atatillugu killiliussanik ilusilersorluakkanik illersuutaasussanik pilersitseqataassallutik, aamma tamatumani siunissaq eqqarsaatigalugu, silap allanngornerata kingunerisaanik aalisanermi pisuussutinik pissarsiniarneq allanngortinneqarsimagaluarpat.

Aalisanermut ministerip Aspakerip aamma Naalakkersuisut Siulittaasuata kalaallit-norgemiullu illuatungeriillutik aalisarnermut isumaqatigiissutaata naammangisimaarnera uppernarsarpaat. Barentsip Imartaani saarullinniarnermut atatillugu piginnaasatta ineriartortittuarnissaat Kalaallit Nunaannut aamma pingaaruteqarpoq, aammalu ilisimatusarnerup biologillu tungaannit siunnersuisarnerup suleqatigiissutiginerat annertusartaria-qarparput.

Kalaallit Tunumi avaleraarsartuunik ammassassuarnillu misileraallutik aalisarnerannut atatillugu Aalisarnermut Ministerip Aspakerip oqaatigaa, Kalaallit Nunaata ukiualuit

ingerlaneranni avaleraasartuut ammassassuillu isumaqatiginninniutigineqartarnerannut atatillugu nunatut sinerialittut ilaasortanngornissaminut qinnuteqartariaqartoq.

EU-p puisip amiinik eqqusseqqusiunnaarneranut atatillugu Naalakkersuisut Siulittaasuat aamma Aalisarnermut Ministeri Elisabeth Aspaker isumaqatigiipput, 2009-mi EU-mut puisip amiinik eqqusseqqusiunnaarneq ajuusaarnartuusimasoq. Naalakkersuisut Siulitaasuata tamatuma kalaallinut piniartunut kingunerisai annertuut saqqummiuppai, Norgellu tungaanit WTO-mut tunngatillugu suliap paasineqarnissaa noqqaassutigalugu, tassani Norge aamma Kalaallit Nunaat EU-p puisip amiinik eqqusseqqusiunnaarnerup naggueqatigiinnut Inunnut atuutinnginnissaata attatiinnarnissaanut atatillugu Norge aamma Kalaallit Nunaat akerleriilluinnarlutik inissisimapput.

Norgep Issittumi nunatut uuliaatilittut pingaarutilimmik inissisimasutut aalisarnermik

inuussutissarsiuteqarnermik attassiinnarsimasutut ineriartortitsisimasutullu inissisimaneranut atatillugu, Naalakkersuisut Siulittaasuata qaninnerusumik suleqatigiinnissaq kissaatiginerarpaa, taamaasilluni Norgemiut Oljedirektoratiata aamma Inuussutissarsiornermut, Aatsitassanut Sulisoqarnermullu Naalakkersuisoqarfiup suleqatigiinnissamut isumaqatigiissutaat pioreersut suli qaninnerusumik suleqatigiissutigisinnaanerat, Naalakkersuisut Siulittaasuata oqaatigaa. Tamanna pitsaasumik ilassilluarneqarpoq, Norgep Kalaallit Nunaat qinnuigimmagu, suleqatigiissutigiissutigisat sukkut annertusarneqarsinnaanerat pillugu siunnersuutinik aalajangersimasunik saqqummiusseqqummagu.

Naalakkersuisut Siulittaasuat Aleqa Hammond ataatsimeereernerup kingorna ima oqaaseqarpoq:

”Aalisakkanik pisuussutitta inuussutigisassatta illersornissaat pingaaruteqarpoq, aamma siunissami.

 

Norgep takutippaatigut, ataatsikkut naalagaaffiusoqarsinnaasoq aalisarnermik uuliasiornermillu ingerlataqartoq.

Nunatta akornanni qanimut suleqatigiinneq nuannaarutigaara, tamatumani aalisarnermut tunngatillugu aamma uuliasiornermut atatillugu ineriartortitsinitsinnut atatillugu.”

Aqagu Naalakkersuisut Siulittaasuat Arctic Frontiersip ataatsimeersuarneranut atatilugu oqalugiarnerminut atatillugu Norgep Statsministeria Erna Solberg ataatsimeeqatigissavaa.

 

Aleqa Hammond,

Naalakkersuisut Siulittaasuat

 

Paasissutissat sukumiinerusut uunga attaveqarnikkut pissarsiarineqarsinnaapput:

Pisortaq Kai Holst Andersen, Nunanut Allanut Pisortaqarfik, Mobil +45 40 17 82 93