Aalisarnermut inatsisip allanngortinneqarnissaanut siunnersuut ukiamut kinguartinneqarpoq

 

Ilimasaarutigineqareersutut aalisarnermut inatsisissap allanngortinneqarnissaa pillugu siunnersuut Inatsisartut upernaaru ataatsimiinneranni oqaluuserisussaagaluarpaat.

Aalisarnermut, Piniarnermut Nunalerinermullu Naalakkersuisuugallartoq, Aleqa Hammond, Naalakkersuisut siulittaasuat, Naalakkersuisunut inassuteqaasiorpoq aalisarnermut inatsisip allanngortinneqarnissaanut siunnersuutip oqaluuserineqarnissaa Inatsisartut ukiaru ataatsimiinnissaannut kinguartinneqartoq.

- Tusarniaanermi isorinnittunik akissutigineqartut tunngavigalugit inatsisip allanngortinneqarnissaanut suli annerusumik oqaluuserineqarnissaanut periarfissaqartoqarmat inatsisissap Inatsisartuni  oqaluuserineqarnissaa kinguartinneqarpoq, Aalisarnermut, Piniarnermut Nunalerinermullu Naalakkersuisuugallartoq, Aleqa Hammond erseqqissaavoq.

- Aalisartut, tunisassiortut innuttaasullu inatsisip allanngortinneqarnissaata saqqummiunneqannginnerani sunniuteqaqataanissaat pingaaruteqarmat, minnerunngitsumillu Naalakkersuisuni ilaasortanngortussap Finn Karlsenip inatsisip allanngortinneqarnissaanut sunniuteqaqataalluarnissaa aamma pingaaruteqarmat kinguartitsisoqarpoq, Aalisarnermut, Piniarnermut Nunalerinermullu Naalakkersuisuugallartoq, Aleqa Hammond, kinguartitsinermut tunngavilersuilluni oqarpoq. 

Inatsisip allanngortinneqarnissaanut siunnersuummut uku qulequtaapput: Atuisut ilisimasaasa siunnersuinermut ilaatinneqartalernissaat, aalisarsinnaanermut periarfissat (aalisartuunissamik piumasaqaat) aamma tunisassiortut aalisartullu immikkoortinneqarnerannik allannguutit.