Erseqqissaaneq

§ 37 apeqqutit pillugit

Sara Olsvigip, IA, tusagassiuutinut nalunaarutaa Sermitsiaq.ag-imi 12. januar 2014 issuarneqartumi oqaatigineqarpoq inatsisitigut ataataqanngitsut pillugit § 37 naapertorlugu apeqqutit arlallit 2013-mi decemberip aallartisimalernerani apeqqutigineqartut Naalakkersuisut Siulittaasoqarfianut suli akineqarsimanngitsut.

Naalakkersuisut Siulittaasoqarfiata uppernassassavaa apeqqutit pineqartut Inatsisartut Allattoqarfianiit 3. december 2013 tiguneqarmata. Naalakkersuisut Siulittaasoqarfianiit 17. december 2013 allakkat Inatsisartut Allattoqarfianut ingerlatinneqarput tassuuna ilisimatitsissutigineqarluni Inatsiseqarnermut Immikkoortortami inuttaqarnikkut inissisimaneq pissutigalugu apeqqutinut akissutit kingusinnerpaamik 20. januar 2014 tunniunneqarsimassasut.

Samråd pillugu  

Inatsisartuni Inatsiseqarnermut Ataatsimiititaliami ilaasortat ilaasa Naalakkersuisut Siulittaasuat piaartumik naapillugu samrådeqarfigisinnaaneraat pillugu saaffiginnissut Inatsisartut Allattoqarfianneersoq Naalakkersuisut Siulittaasuata Naalakkersuisoqarfiata 10. december 2013 tiguvaa. Taama kissaateqarnermut tunngaviuvoq inatsisitigut ataataqanngitsut taarsiiffigineqarnissaat pillugu apeqqummut akissut Qallunaat Naalakkersuisuiniit Folketingip Grønlandsudvalgianut ulloq taanna tunniunneqarnera.

Naalakkersuisut Siulittaasuata Naalakkersuisoqarfia ulloq taanna akivoq Inatsiseqarnermut Immikkoortortap inuttaqarniarnikkut inissisimanera pissutigalugu piaartumik ataatsimeeqatigiinneq samråd pisinnaanngitsoq. Naalakkersuisut Siulittaasuata Naalakkersuisoqarfiata ilisimatitsissutigaa ataatsimeeqatigiinneq samråd pisinnaasoq 6. januar 2014-p kingorna, tamannalu qanoq Inatsiseqarnermut Ataatsimiititaliamit isumaqarfigineqarnersoq apeqqutigineqarluni. Naalakkersuisut Siulittaasuata Naalakkersuisoqarfianiit apeqqutigineqartoq taanna akineqarsimanngilaq.